Kryeministri Edi Rama tha këtë të Shtunë se PD “duhet të kishte shkuar në djall shumë kohë më parë”.
Deklaratën e bëri nga podiumi i Kongresit të PS, nga ku më herët Ditmir Bushati tha se “situata e pazakontë që po përjeton opozita duhet të na shqetësojë se jeta politike në një republike parlamentare nuk funksionon normalisht pa pasur alternativë përkundrejt shumicës”.
Ndërsa, Rama tha se ndjen “zero keqardhje“ për situatën ku ndodhet Partia Demokratike.
“Ajo forcë duhet të kishte shkuar në djall shumë kohë më parë, shumë kohë më parë që Shqipëria të kishte një opozitë serioze. E për sa kohë ajo forcë vijon të jetë aty, Shqipëria nuk ka për të pasur një force opozitë serioze. Prandaj ne duhet të jemi shumë të shqetësuar jo na mungon opozita andej, por sepse nuk duhet të biem në kurthin e atij që s’është i motivuar të luftojë. Prandaj forcën tonë duhet ta masim me fuqinë që kemi për ti bashkuar qytetarët shqiptarë, është shumë më e vështirë se të kesh opozitën, atë opozitë që të pakën kemi pas, përmes një politike që është politika e jetës së tyre reale… “, u shpreh Rama.
