Drejtori i Portit të Durrësit, Pirro Vëngu pritet të merret në pyetje nga hetuesit lidhur me vdekjen e mistershme të shoferit të tij.
Ngjarja
Betim Kastrati 38-vjeç, u gjet i pa jetë në makinën e tij në aksin rrugor Fier – Lushnjë, rreth mesnatës së djeshme. Sipas policisë, Kastrati u gjet i vdekur brenda automjetit tip “Volvo” në afërsi të rreth-rrotullimit të Kolonjës. Po sipas të njëjtave burime, makina ishte e parkuar në mënyrë të rregullt në një xhep rruge. Dyshimet paraprake të policisë janë se 38-vjeçari, i cili punonte si shoferi i Drejtorit të Portit të Durrësit Pirro Vëngu, është vetëvrarë. Megjithatë hetimet për rastin vijojnë, pa përjashtuar edhe një vrasje të mundshme.
Sipas raportimeve mediatike, 38-vjeçari ishte nisur nga Durrësi drejt në Fier për të biseduar me kunatën e tij për të rregulluar marrëdhëniet me bashkëshorten me të cilën ishte në proces divorci e që jetonin në dy vende të ndryshme. Me këtë të fundit, sipas të njëjtave burime, jetonin dhe dy fëmijët e çiftit.
Vetëvrasja nuk bind
Pavarësisht problemeve familjare, miqtë dhe familjarë të tij nuk e konsiderojnë bindëse versionin e vetëvrasjes.
Për sa i përket dinamikës se ngjarjes, ende nuk ka një zbardhje të plotë të saj, ndërsa mbeten mister edhe rezultatet balistike të armës së gjetur në vendngjarje.
E shkuara si gardist, sipas miqve të viktimës, e kishte bërë 38-vjeçarin një tip të fortë dhe i trajnuar mirë për të kaluar situata të vështira, madje shtojnë se ai ka qenë një tip sportiv dhe i vendosur.
