Kryeministri Edi Rama mbrëmjen e sotme (26 Shkurt) ka ndërmarrë ndryshime në kabinetin qeveritar, duke larguar nga detyra Belinda Balluku, Pirro Vengu dhe Elisa Spiropali. Në vend të tyre janë emëruar katër emra të rinj.
Enea Karakaçi – Ministria e Infrastrukturës dhe Energjisë
Në krye të Ministrisë së Infrastrukturës dhe Energjisë është vendosur Enea Karakaçi, i cili zëvendëson Belinda Ballukun. Karakaçi ka mbajtur postin e administratorit të OSHEE-së që nga qershori 2023. Më herët ka qenë Drejtor i Përgjithshëm për Politikat dhe Zhvillimin e Energjisë dhe Industrisë në të njëjtën ministri.
Ferit Hoxha – Ministria për Evropën dhe Punët e Jashtme
Diplomati i karrierës Ferit Hoxha merr drejtimin e Ministrisë për Evropën dhe Punët e Jashtme pas largimit të Spiropalit. Me mbi 30 vite eksperiencë në diplomaci, ai ka shërbyer si ambasador i Shqipërisë në Bashkimin Evropian, në Belgjikë, Francë dhe si Përfaqësues i Përhershëm në OKB në Nju Jork. Gjithashtu ka mbajtur postin e Sekretarit të Përgjithshëm në Ministrinë e Jashtme dhe ka qenë ambasador në UNESCO.
Ermal Nufi – Ministria e Mbrojtjes
Në vend të Piro Vengut, Ministrinë e Mbrojtjes do ta drejtojë Ermal Nufi. Ai është jurist me formim në Fakultetin e Drejtësisë në Universitetin e Tiranës dhe aktualisht ka mbajtur detyrën e Zëvendës Sekretarit të Përgjithshëm të Kryeministrisë. Ka përvojë si konsulent ligjor, pedagog i jashtëm dhe avokat i licencuar. Gjithashtu ka mbajtur funksione drejtuese në Autoritetin Rrugor Shqiptar dhe në Agjencinë Shtetërore të Kadastrës.
Erjona Ismaili – Ministre për Marrëdhëniet me Parlamentin
Erjona Ismaili zëvendëson Toni Gogun në postin e ministres për Marrëdhëniet me Parlamentin. Ajo është deputete në legjislaturën aktuale, juriste me diplomë në Drejtësi dhe me studime pasuniversitare në të Drejtën Administrative dhe Marrëdhënie Publike Politike. Ka qenë e angazhuar edhe në shoqërinë civile.
