Kreu i njësisë administrative të Kallmetit, Besnik Simoni dhe 41-vjeçari Altin Marku do të qëndrojnë në burg.
Seanca gjyqësore ndaj tyre u mbajt të hënën pasdite në Spitalin e Traumës në Tiranë, ku po marrin mjekim, për shkak të plagëve që kanë marrë.
Ata janë përfshirë në një sherr të ashpër, ku janë përdorur edhe armët e zjarrit.
Zyrtari i pushtetit vendor Besnik Simoni dhe 41-vjeçari Altin Marku nuk kanë folur asnjë fjalë në lidhje me ngjarjen.
Por referuar provave të paraqitura nga prokurori, Françesk Ganaj, gjyqtari Artan Hajredinaj e cilësoi të ligjshëm ndalimin e tyre dhe vendosi masën e sigurisë “Arrest në burg” për veprat penale “Vrasja me dashje, mbetur ne tentativë” dhe “Prodhimi dhe mbajtja pa leje e armëve e municionit luftarak”.
Kryetari i Njësisë Administrative të Kallmetit, Besnik Simoni, dhe 41-vjeçari Altin Marku u arrestuan nga policia, pasi qëlluan me armë në drejtim të njëri-tjetrit.
Ngjarja ndodhi rreth orës 13 e 30 minuta të së premtes, në rrugën që lidh fshatin Kallmet me superstradën Lezhë-Shkodër.
Zyrtari lokal mbeti i plagosur dhe u dërgua menjëherë në Spitalin Rajonal të Lezhës, e më pas drejt Spitalit të Traumës në Tiranë. Katër orë pas ngjarjes, gjeti të plagosur në një banesë në Kallmet dhe 41- vjeçarin Altin Marku, i cili u dërgua menjëherë në Spital për ndihmë mjekësore.
Pas hetimeve që janë kryer, ka rezultuar se dy bashkëfshatarët kanë qëlluar 19 herë në drejtim të njëri-tjetrit me armë.
Mësohet se mes tyre ka pasur një konflikt, që kishte nisur një vit më parë, për arsye banale.
Ky konflikt nuk ishte mbyllur, por vetëm sa ishte acarruar me kalimin e kohës.
