Një 24-vjeçar është arrestuar nga Policia e Beratit, në kuadër të operacionit të koduar “Dimal”.
Ky operacion shërbeu për goditjen e veprimtarisë kriminale në fushën e tregtimit të lëndëve narkotike.
Njoftimi i policisë:
Shërbimet e Stacionit të Policisë Dimal, në bashkëpunim me Seksionin për Hetimin e Narkotikëve në DVP Berat, “bazuar dhe në informacionet e siguruara në rrugë operative, se 2 shtetas shpërndanin lëndë narkotike cannabis sativa, organizuan dhe finalizuan operacionin “Dimal”, për kapjen e tyre. Si rezultat u bë arrestimi në flagrancë i shtetasit:
F.M., 24 vjeç, banues në lagjen “4 Shtatori”, Dimal. Gjithashtu u procedua në gjendje të lirë shtetasi H. M., 29 vjeç, banues në lagjen “4 Shtatori”, Dimal.
Gjatë kontrollit fizik ndaj këtyre shtetasve dhe kontrollit në banesat e tyre, shërbimet e Policisë kanë gjetur dhe sekuestruar në cilësinë e provës materiale, një sasi lënde të dyshuar narkotike të llojit cannabis sativa, të ndarë në doza (me qese farmaceutike), gati për shitje”, tha policia.
Materialet i kaluan Prokurorisë pranë Gjykatës së Shkallës së Parë Berat, për veprime të mëtejshme procedurale.
