Kryetarja e Komisionit Hetimor, Jorida Tabaku ka reaguar pas arrestimeve me urdhër të SPAK të disa zyrtarëve të lidhur me çështjen e inceneratorëve.
Ajo e ka cilësuar këtë veprim si shpresëdhënës por të pamjaftueshëm.
Gjithashtu ajo nxiti SPAK që të tregojë më shumë guxim për të tejkaluar pushtetin politik dhe të bëjë detyrën për të cilën është votuar.
“Kushdo që ka qenë i interesuar për aferën e inceneratorëve, sot ka pasur një zhvillim të ri, një zhvillim i parë në drejtim të punës së komisionit hetimor, është shpresëdhënës por nuk është e mjaftueshme. Në gjykimin tonë, sot me lëvizjet dhe ndalimet e incenerataorit të Fierit, ka pasur një hap përpara. Ky hap nuk është i mjaftueshëm. Pas një pune 4 mujore të Komisionit Hetimor, pas 11 kallëzimeve të dorëzuara në SPAK, pas një raporti prej 120 faqësh me 112 fakte që tregojnë lidhjen në aferën prej 430 milionë eurove ku janë përfshirë, Edi Rama, Damian Gjiknuri, Arben Ahmetaj, SPAK ka reaguar duke arrestuar disa zyrtarë duke përsëritur akuzat ndaj ish-Ministrit Lefter Koka. Presim që SPAK të tregojë guxim dhe të reagojë ndaj njerëzve me pushtet. Presim që SPAK të tejkalojë përtej pushtetit politik dhe të bëjë detyrën për të cilin e kemi votuar. Në njoftimin që mora nga SPAK janë arrestuar disa persona, Pëllum Abeshi, Florian Muçaj është zotëria që ka dëshmuar në komisionin hetimor administrator i ALbPetrolit, Arenc Myrtezani, ish-administratori i kompanisë së Fierit, Sabina Cenameri dhe Etleva Kondi që ka qenë anëtare e komisionit të Fierit” – tha Tabaku.
