Kampioni i botës Max Verstappen fitoi mbrëmjen e sotme garën e Çmimit të Madh të Arabisë Saudite në Formula 1 në pistën e Jeda.
Edhe pse e nisi garën nga vendi i katërt, ai arriti të triumfojë duke parakaluar 4 xhiro nga fundi Charles Leclerc me Ferrari.
I treti u klasifikua piloti tjetër i Ferrarit, spanjolli Carlos Sainz (nën hetim dhe rrezikon podiumin), që la pas meksikanin e Red Bull, Sergio Perez. Ky i fundit e nisi garën nga “pole” dhe e dominoi atë në 15 xhirot e para, deri në momentin që në pistë hyri makina e sigurisë (6 makina nuk e mbyllën dot garën). Kjo favorizoi makinat që u ngjitën në podium.
Gara ishte mjaft interesante, me një duel të bukur mes Verstappen e Leclerc. Holandezi parakaloi rivalin e “kokëkuqes” në xhirot e fundit dhe e mbrojti kryesimin, duke korrur fitoren e parë sezonale. Në vendin e dhjetë u rendit Lewis Hamilton me Mercedes, që nga kjo garë mori vetëm një pikë (Russell me makinën tjetër Mercedes doli i pesti).
Gjatë garës pati edhe disa incidente, siç ishte aksidenti i Latifi, që solli hyrjen e makinës së sigurisë në pistë. Po ashtu, edhe veteranët Alonso e Ricciardo patën probleme, duke bërë që për disa xhiro të jetë makina virtuale e sigurisë. Gjithsesi, Leclerc e Ferrari ruajnë kryesimin e dy botërorëve, për pilotë e konstruktorë.
https://twitter.com/F1/status/1508153752221634568?ref_src=twsrc%5Etfw%7Ctwcamp%5Etweetembed%7Ctwterm%5E1508153752221634568%7Ctwgr%5E%7Ctwcon%5Es1_&ref_url=https%3A%2F%2Ftelesport.al%2Fverstappen-triumfon-ne-pisten-e-jeda-ferrari-ne-podium-me-dy-pilotet-e-saj%2F
