Teksa ka nisur protesta para kryeministrisë, kreu i qeverisë Edi Rama po zhvillon një takim me fermerë, për prezantimin e paketës sociale për këtë kategori.
“500 MLN LEKË plus për naftën pa taksa, për një total prej 1.45 MLD LEKËSH”, shkruan Rama në një postim në FB, ku transmetohen edhe pamjet e takimit nga periferia e Durrësit.
Gjatë fjalës së tij, Rama ripërsëriti se rritja e çmimeve vjen si pasojë e luftës Rusi—Urainë.
“Rritja e çmimeve ndihet dhe në Australi. Edhe në Australi ka rritje të çmimeve për shkak të luftës në Ukrainë. S’ka hy në luftë një mëhallë me një mëhallë, s’ka hy në luftë Sukthi me Manzën, por një fuqi tregtare që ka burime të naftës, gazit dhe një nga prodhuesit kryesorë të lëndëve të para – Rusia me Ukrainën, një nga prodhuesit kryesorë të drithërave”, deklaroi Rama.
Rama këmbënguli sërish se taksat mbi naftën nuk do preken. Ai tha se ata që kanë makinë, kanë më shumë se ata që s’kanë. “Ata që kanë më shumë do bëjnë çik më shumë sakrificë”, u shpreh ai.
Nga ana tjetër, protestat qytetare vijojnë, ndërsa paketa sociale e qeverisë cilësohet e pamjaftueshme.
