Teksa është në hetim për pasurinë e tij që kap miliarda, deputeti rilindas Alfred Peza sulmon PD-në për çështjen “Manjani”.
Duke folur në Komisionin e Ligjeve, i cili u shoqërua me debate të forta pozitë-opozitë lidhur me shkarkimin e Ylli Manjanit nga posti i ministrit të Drejtësisë, Peza tha: “Ylli Manjani paska bërë një gjë të mirë, të paktën solli deputetët e PD në komision sepse nuk vijnë fare. Ajo që më bën përshtypje është se bëjnë megafonin e Ylli Manjanit duke thënë ato që ai tha dje. Nëse PD nuk do të jetë në lartësinë e detyrës që ja kanë dhënë njerëzit ne s’kemi pse të merremi me litarin që ua la borxh Manjani, por të merremi me ligjet”.
Por lidhur me akuzat ndaj tij për vënie të pajustifikuar pasurie, Peza më herët e ka quajtur sulm të sajuar politikisht gjithë historinë që qarkullon në media. Madje kur foli në “Top Story”, ai la të kuptohej se sulmi e ka burimin nga Partia Demokratike për të tërhequr vëmendjen nga hetimi i CEZ-it.
“Këto ditë ka një zhurmë të madhe të madhe përsëri me miliona, siç është hetimi për CEZ-in, ku një i afërm i Qeverisë Berisha ka tërhequr kesh para nga një bankë 7 milion euro”, tha ai. Këtë sulm, ai e quajti “reciprocitet politik”.
“Ka një reciprocitet politik në sulmin tim. Reciprociteti ishte hajde të shpikim një histori paralele në anën e mazhorancës që bën fjalë po për miliona dhe njerëz politikë dhe u gjet historia e Alfred Pezës”, tha ai.
Teksa shtoi se 1/3 e pasurisë së tij e ka të vënë nga interesat bankare.
