Ish-presidenti amerikan Donald Trump e konsideroi si diçka të trishtueshme për botën, sulmin ushtarak të Rusisë ndaj Ukrainës.
Ai shtoi se diçka e tillë nuk do të kishte ndodhur gjatë administratës së tij.
“Kjo është diçka që nuk duhet të kishte ndodhur kurrë. Kjo nuk do të kishte ndodhur gjatë administratës sime dhe nuk do të kishte ndodhur tani. Dhe është një gjë shumë e trishtueshme për botën, për vendin dhe sigurisht është shumë e trishtueshme për shumë njerëz që do të vriten pa nevojë”, u shpreh Trump në një reagim.
Nga ana tjetër,Presidenti i Shteteve të Bashkuara të Amerikës, Joe Biden zhvilloi një bisedë telefonike me homologun ukrainas, Volodymyr Zelensky, pak minuta pas shpërthimeve të para nga sulmi i ushtrisë ruse.
Kreu i Shtëpisë së Bardhë dënoi sulmin e paprovokuar të forcave ruse dhe deklaroi se shumë shpejt do të shpallen masat ndaj këtij vendi.
“Dënoj sulmin e paprovokuar dhe pajustifikuar të forcave ushtarake ruse. Fola me Zelensky për hapat që do të ndjekim për të bashkuar dënimin e komunitetit ndërkombëtar dhe në Këshillin e Sigurisë së Kombeve të Bashkuara”, u shpreh Biden në një reagim.
Biden shtoi se Zelenky i kërkoi që të telefononte liderët e botës që të flasin qartë kundër agresionit të presidentit Putin.
