Kryeministri Edi Rama është paraqitur para Komisionit Hetimor parlamentar për inceneratorëve, ndërsa u pyet nëse Lefter Koka është ose jo pronar përfitues, ndërsa u shpreh se “Komisioni nuk mund të ngrejë akuza penale, apo të ushtrojë kompetencat e një Gjykate”.
Rama tha se është paraqitur si dëshmitar, që Komisioni të bënte punën e tij, bazuar në ligj.
“Mos eksportoni debatin parlamentar apo televiziv në këtë komision. Unë kam dhënë mbështetjen e plotë për këtë Komision, ndaj respektoni ligjin”, tha Rama.
Kryeministri ka shmangur përgjigjet ndaj pyetjeve që i janë drejtuar lidhur me njohjet e ministrit Arben Ahmetaj apo Damian Gjiknurit me pronarët e inceneratorëve, apo nëse ata dhe Lefter Koka janë përfitues nga ajo që Kryetarja e Komisionit Hetimor, Jorida Tabaku, e konsideroi aferë.
Kryeministri tha se nuk është në dijeni të ndonjë afere. “Unë s´kam ardhur këtu për asnjë afere, që ta keni të qartë”, tha Rama.
Duke iu përgjigjur pyetjes që iu drejtua, Rama tha se Lefter Kokën e njeh si ish-ministër të Mjedisit dhe jo si përfitues.
Rama, duke iu drejtuar Jorida Tabakut, tha se në Komision duhet të flisni mbi dokumentet dhe faktet dhe jo opinionet tuaja, ato mund ti përfshini në raportin tuaj.
I pyetur nëse është në dijeni të njohjeve të ministrit Ahmetaj me pronarët e inceneratorëve, Rama tha se si Kryeministër në tagrin e tij, nuk i intereson aspak për miqtë e gjithkujt, përfshi edhe z. Ahmetaj. “Nuk kam asnjë tagër që të njoh mikun apo miqtë e gjithkujt, përfshi edhe ju që jeni këtu”, tha Rama. Sipas tij, përgjegjësia se me kë rri njëri apo tjetri, është individuale.
Në lidhje me Damian Gjiknurin, Rama tha se “më keni thirrur lidhur me çështjen e inceneratorëve, apo për të më pyetur a dini gjë për lidhjet e filanit me filanin, etj etj”.
Duke replikuar me Ramën, Tabaku tha se lideri përgjigjet edhe për ministrat, edhe për shkeljet ligjore, edhe për aferat, përfshi edhe këtë të inceneratorëve.
I pyetur nëse për inceneratorët Shqipëria bie ndesh me direktivat e BE, ashtu sikundër thuhet në raportet e progres-raportet, Rama u shpreh “jo BE nuk është shprehur kundër”.
“Ne nuk kemi ndërtuar inceneratorë, por impiante të përpunimit të mbetjeve dhe prodhimit të energjisë, ndërsa incenerimi është proces i këtyre impianteve”, tha Rama.
Lexo edhe:
Rama: Koka ka bërë korrupsion individual, t´ia provojë Gjykata
Rama në komisionin hetimor: Pushteti është i keq shumë, përgjegjësia është individuale
Miratimi i 17 akteve në një ditë, Rama: Mos më ofendoni inteligjencën
