Kryeministri Edi Rama u shpreh sot para Komisionit Hetimor parlamentar për inceneratorët tha se është zgjedhur për të udhëhequr, që do të thotë çfarë do të bëjmë, pse dhe si do e bëjmë këtë gjë.
“Ka një makinë shtetërore që ka bërë detyrën e vet, kjo është ajo që mund t´ju them”, tha Rama, duke i përgjigjur pyetjes mbi 17 aktet që janë miratuar brenda një dite në 17 dhjetor, lidhur me inceneratorët.
Në replikë me Ramën, Jorida Tabaku, tha se ia drejtoi pyetjen për faktin se dëshmitarët e paraqitur në Komision ose kanë thënë nuk dimë gjë, ose kanë pasur amnezi, lidhur me këtë çështje.
“Nuk refuzoj ti përgjigjem asnjë pyetjeje, më bëni pyetje për rolin tim si Kryeministër”, replikoi Rama, duke kërkuar nga Tabaku që të mos interferojë vokalisht me të.
“Nuk jam këtu për të plotësuar nevojat tuaja”, tha Rama, duke shtuar “ju nuk e dini si fuksionon fare mbledhja e Qeverisë”.
Duke iu rikthyer pyetjes mbi 17 aktet e miratuara në mbledhjen e 17 dhjetorit, Rama tha se ato kanë mbërritur në Qeveri pasi kanë kaluar në filtrat e makinës shtetërore.
“Këtu është zbardhur në mënyrë shembullore e gjitha rruga e miratimit të akteve, flas në aspektin ligjor, ndërsa nëse organi i hetimit identifikon shkelje, atëherë përgjegjësia është individuale. Pushteti është i keq, por secili mban përgjegjësi individuale për çdo shkelje”.
“Nuk bën sens pyetja që më bëni, mos më ofendoni inteligjencën time”, tha Rama. Ai tha se nuk mban mend asnjë mbledhje Qeverie, përveç asaj që ka marrë vendim për të vendosur fotografinë e Ismail Qemalit.
