Dy biznesmenë u arrestuan nga policia mbrëmjen e djeshme, si pjesë e një grupi që merreshin me shpërndarjen e sasive të mëdha të drogës nga Kruja në drejtim të kryeqytetit.
Mësohet se të arrestuarit janë dy biznesmenë të njohur nga Fushë- Kruja, ortakë të një kompanie private. Ata u arrestuan mbrëmjen e së enjtes bashkë me 5 persona të tjerë.
Biznesmenët e arrestuar janë Shkëlqim Miri dhe Bledar Çoraj, ortakë të kompanisë “Rinia ’96”, që ushtron aktivitetin në fushën e grumbullimit dhe asgjësimit të plehrave.
Policia zhvilloi një operacion të gjerë në rrugën që lidh Fushë-Krujën me Vorën, duke arrestuar personat e përfshirë në këtë rrjet.
Sakaq u kap një sasi prej 425 kg hashash, kurse gjatë kontrolleve në banesat e të dyshuarve u gjet edhe arsenal armësh, 12 automatikë e pushkë.
Bashkë me biznesmenët u arrestuan edhe Egli Selaci, 28 vjeç, Amarildo Mulleti, 30 vjeç, Durim Demiri, 24 vjeç dhe Hysni Demiri, 59 vjeç.
Në operacion morën pjesë oficerë të drejtorisë për Hetimin e Narkotikëve dhe Trafiqeve nën koordinimin e Prokurorisë së Krimeve të Rënda, në bashkëpunim me oficerët e Forcës së Posaçme Operacionale të Policisë së Tiranës, si dhe me mbështetjen e Policisë së Durrësit.
