Kryetari i PD, Lulzim Basha ka reaguar pas vendimit të dhënë nga Apeli i GJKKO, për ish ministrin e Brendshëm, Saimir Tahiri i cili është dënuar me 3 vite dhe 4 muaj burgim.
Përmes një postimi në fb, Basha shprehet se vendimi i dhënë për dënimin me burg të ish ministrit, tregonte se akuzat e bëra nga partia Demokratike, kishin qenë të vërteta, ndërsa shton se, dy ish ministriat, Saimir Tahiri dhe Lefter Koka, janë vetëm 2 prej hallkave të zinxhirit të krimit dhe të korrupsionit.
“Vendimi i sotëm për Saimir Tahirin dëshmon sa të vërteta kanë qenë akuzat e PD për përfshirjen e ish-Ministrit të Brendshëm në trafikun ndërkombëtar të lëndëve narkotike. Faktet e përfshirjes së tij në një grup të strukturar kriminal janë dëshmi e qartë se në krye të bandës është Edi Rama, njeriu që e emëroi, mbrojti dhe përdori çdo mekanizëm për të zvarritur dënimin e vartësit të tij. Saimir Tahiri dhe Lefter Koka janë vetëm dy nga hallkat e zinxhirit të krimit dhe korrupsionit që ka për autor dhe zbatues Edi Ramën!”,- shkruan Basha.
