Policia italiane dhe holandeze goditën një organizatë kriminale të trafikut të drogës duke vënë në pranga 18 persona mes të cilëve shumica shqiptarë.
Operacioni i koduar “Fontanella 2019”, i drejtuar nga prokurori i Bergamos, Emanuele Marchisio, çoi në arrest me burg 12 persona mes të cilëve shqiptarë, afrikano-veriorë, italianë e një shtetasi holandezë, ndërkohë që 5 të tjerë janë lënë në arrest shtëpiak.
Sipas mediave italiane, 9 prej personave të ndaluar janë shtetas shqiptarë, ndërkohë që 8 prej tyre janë vënë në masën nën arrest me burg.
Hetimet e nisura në vitin 2019 kanë vërtetuar se grupi kriminal trafikonte sasi të mëdha kokaine nga Vendet e Ulëta drejt Italisë Veriore.
Baza operative e tyre ishte në disa komuna të Bergamos si në Trescore, Balenario, Montello e në Cornate D’Adda.
Kokaina trafikohej nga Europa Veriore përmes automjeteve të modifikuara ndërkohë që gjatë hetimeve është sekuestruar një park me automjete që përdoreshin për trafikimin e kokainës e parave cash.
Totali i drogës që policia i ka sekuestruar grupit është rreth 24 kg kokainë që sipas autoriteteve policore italiane në tregun e shitjes me pakicë do të sillte një fitim prej 2 milionë euro. Hetimet gati 3-vjeçare kanë mundësuar edhe arrestimin në flagrancë 3 korrierëve që vepronin për llogari të grupit në Firenze e Bergamo. Gjithashtu janë sekuestruar 300 mijë euro cash e një pistoletë.
Operacioni i koduar Fontanella 2019 u ekzekutua me pjesëmarrjen e rreth 100 trupave policorë të reparteve të Bergamos, Firenzes, Torino, Brescia, Genova e me ndihmën e repartit ajror dhe të qenëve antidrogë
