Deputetët e opozitës kërkuan që kryetari i Bashkisë së Tiranës, Erion Veliaj, të ishte i pranishëm në mbledhjen e komisionit të ligjeve, që zhvilloi një seancë dëgjimore për banesat e prishura te rruga “5 Maji”.
Përveç Veliajt, në dëgjesë, me kërkesë të 1/3-ës së deputetëve të PD, ishin thërritur edhe Drejtori i Përgjithshëm i Policisë së Shtetit, Gledis Nano, Avokati i Popullit, Erinda Ballanca, si dhe përfaqësues të banorëve të prekur nga projekti.
Veliaj kishte dërguar një përgjigje me shkrim, lidhur me çështjen, e cila u quajt e vlefshme nga kryetarja e komisionit, Klotilda Bushka, por jo nga demokratët.
“Ç’është ky që nuk begeniska të vijë. Është me Covid? Është duke u marrë me federatën? Shkresa ka nxjerrë pa fund bashkia, por duhet ta dëgjojmë, duhet të përballet. Njerëzit janë pa shtëpi, dhe nuk ua ka shkaktuar natyra, por shteti. Pse nuk vjen? Kjo është tallje e madhe me, me Kuvendin”, tha deputeti i PD, Enkelejd Alibeaj. “Kur vjen fushata ne u bëjmë premtime, i mashtrojmë, si politikë. Por kaq detyrim nuk ka politika? Duhet të vijë. Kanë ardhur këta të policisë, por duhet të vijë ai, e thotë vetë që është ai strumbullari i gjithçkaje”.
Një ditë më parë, PD bëri kallëzim penal në SPAK kundër Erion Veliajt, pasi ndërtimi tek “5 Maji” sipas tyre i është dhënë një trafikanti droge, në kundërshtim me ligjin. Kallëzimi është bërë për shpërdorim detyre dhe shkelje e barazisë në tendera, pasi, sipas PD, Bashkia e Tiranës i dha një tender me vlerë mbi 10 milion euro, kompanisë në pronësi të shtetasit Anton Gjinaj, alias Pashk Rapi, person me rekorde të rënda kriminale, sipas PD. Demokratët gjithashtu pretendojnë se ky person njihet për lidhjet e afërta me familjarët e Sali Berishës.
