Shqipëria vijon e më shpesh përdoret si pikë tranziti për emigrantët e vendeve të treta për të vijuar më pas udhëtimin në shtetet e Bashkimit Europian aty ku ata e shohin si toka e premtuar.
Klandestinët të cilët vijnë kryesisht nga Lindja e Mesme dhe Afrika Veriore, futen në territorin tonë nëpërmjet kufirit të gjelbër kryesisht nga pika kufitarë e Qafë Botës. Më pas kundrejt fitimit ata transportohen me furgonë apo makina drejt kufirit me Kosovën apo Malin e Zi.
Policia e Kukësit ka ndërmarrë një sërë kontrollesh për të parandaluar këtë trafik. Vetëm gjatë 24 orëve të fundit janë evidentuar dhe goditur edhe 4 raste të tjera të tentativës për dhënie ndihmë për kalim të paligjshëm të kufirit tha sot (9 dhjetor 2021) Drejtori i DVP Kukës, Drejtues Edmond Sulaj.
Morina: 46 emigrantë të ndaluar në një ditë
Në vijim të operacionit policor të koduar ”Morina”, gjatë 24 orëve të fundit janë evidentuar dhe goditur edhe 4 raste të tjera të tentativës për dhënie ndihmë për kalim të paligjshëm të kufirit, ku si rezultat janë arrestuar 4 shtetas, një nga Prishtina dhe 3 nga Tirana.
“Këta shtetas janë arrestuar në flagrancë, pasi janë kapur nga shërbimet e Policisë, në hyrje të Tunelit të Kalimashit dhe në afërsi të Morinës, në tentativë për t’i kaluar nga kufiri i gjelbër, duke i transportuar me automjetet e tyre, 46 emigrantë të paligjshëm, për t’i kaluar në mënyrë të paligjshme nëpërmjet kufirit të gjelbër, drejt Kosovës, kundrejt fitimit deri në 500 euro për person”, tha drejtori i policisë vendore Edmond Sulaj, në një deklaratë për mediat.
Në cilësinë e provës materiale u sekuestruan automjetet që përdoreshin për të transportuar emigrantët, vlera monetare dhe celularë.
Të arrestuar janë D. A., 29 vjeç, banues në Prishtinë; E. D., 37 vjeç, E. D., 36 vjeç, dhe E.T., 43 vjeç, të tre banues në Tiranë.
Bilanci: 17 raste për një muaj
Policia e Kukësit njofton se gjatë muajit nëntor 2021, janë goditur 17 raste të kësaj veprimtarie kriminale të dhënie ndihmë për kalim të paligjshëm të kufirit.
“Gjatë muajit nëntor 2021, janë goditur 17 raste të kësaj veprimtarie kriminale, ku janë arrestuar 16 shtetas dhe janë proceduar në gjendje të lirë 2 të tjerë. Janë bllokuar 93 shtetas nga vendet e treta, kryesisht nga Siria”.
Trafikantët po përdorin rrugëkalime të reja me qëllim shmangien e kontrolleve të Policisë në akset nacionale.
“Bazuar dhe në analizën e riskut të bërë gjatë javës së fundit, ku ka rezultuar se personat që tentojnë të kryejnë këtë veprimtari kriminale, po përdorin rrugëkalime të reja me qëllim shmangien e kontrolleve të Policisë në akset nacionale, Drejtoria Vendore e Policisë Kukës, në bashkëpunim me Drejtorinë Vendore të Kufirit dhe Migracionit Kukës, ka organizuar shërbime investigative dhe patrullime, duke përdorur kamerat dhe dylbitë për ditën dhe natën, si dhe kanë instaluar në rrugëkalimet e reja, pajisje speciale që i janë dhuruar Policisë së Shtetit nga policitë partnere, me qëllim parandalimin dhe goditjen e kësaj veprimtarie kriminale”, njofton policia.
