Epidemiolo Taulant Muka shprehet se “Omicron”, varianti më i fundit i Sars-Cov-2 ka mbi 30 mutacione që kanë prekur proteinën spike, me anë të të cilës virusi hyn në organizëm.
Në një intervistë për Syri Tv, Muka shprehet se ende nuk ka informacione se çfarë impakti kanë këto mutacione në lidhje me transmetueshmërinë, sëmundshmërinë, vdekshmërinë apo tejkalimin e imunitetit që vinë prej infeksionit natyral apo vaksinimit.
“Deri tani nuk ka vend për panik por sigurisht që mutacionet janë të pritshme për sa i përket virusit të ngjashëm respirator sikundër është me gripin. Ne duhet të fokusohemi te masat e përgjithshme që kemi pasur gjatë periudhës pandemike që lidhet me grumbullimet e brendshme, sa më shumë punë nga shpia kur është e mundur dhe pa panik.
Ne e prisnim që të kishim raste të rritura gjatë dimrit, dhe nuk duhet të surprizoheshim nga ky mutacion sepse edhe vaksinat e gripit dalin çdo vit që ti përshtaten varianteve të reja të gripit.
Nuk kemi informacion për këtë variant, nuk ka të dhëna dhe OBSH ka njoftuar se nuk kemi asnjë të dhënë për momentin për sa i përket trasmetueshmërisë, vdekshmërisë dhe të tjera”, tha Muka.
