Mbrëmjen e djeshme në qendër të qytetit të Shkodrës u ekzekutua me armë me silenciator ish-deputeti dhe ish-Kryetari i komunës së Velipojës, Pashko Ujka, 64 vjeç.
Ujka u qëllua nga pas shpine, ndërsa po ecte shumë pranë banesës së tij, me bashkëshorten dhe të vëllain.
Pothuajse 24 orë pas krimit policia nuk ka asnjë të dyshuar lidhur me atentatin që i mori jetën ish-deputetit, i cili prej vitit 2015 ishte shkëputuar nga politika aktive dhe merrej me sipërmarrjen në fushën e hoteleri-turizmit dhe ndërtime.
Policia po heton në disa pista që lidhen me periudhën kur Ujka ka drejtuar komunën e Velipojës, por edhe në ato që lidhen me veprimtarinë në fushën e biznesit.
Burime policore shprehen se dyshimet janë se ekzekutimi i 64-vjeçarit mund të jetë bërë nga 1 vrasës me pagesë, i cili nga pamjet filmike të siguruara nga policia, duket se ka vepruar i vetëm në momentin e krimit dhe është larguar me vrap nëpër rrugica.
Familjarët që ishin në shoqërinë e 64 vjeçarit nuk kanë mundur të pikasin as atentatorin pasi ai ka vepruar i vetëm, ndërsa ka qëlluar me pistoletë me silenciator.
Gruaja e të ndjerit është shprehur se vrasjen e ka kuptuar pasi bashkëshorti i saj është rrëzuar në tokë. Grupi hetimor është përqendruar në disa pista, që të detyra si kryetar komune, por edhe tek fusha e ndërtimit. Gjithashtu po hetohen edhe pista e konflikteve të mundshme të djalit të viktimës me persona të tjerë.
Referuar disa dëshmive që kanë dhënë familjarë të tij pranë grupit hetimor, ata kanë rrëzuar pistat e hetimit që përmenden në media, se Pashk Ujka ka pasur borxhe, konflikte apo probleme me persona të tjerë.
Policia është treguar e rezervuar lidhur me ngjarjen, ndërsa nga pamjet filmike të siguruara, autori nuk mund të identifikohet, megjithatë ekspertët mund të arrijnë të krijojnë një identikit të tij, bazuar në disa të dhëna.
