Biznesmeni Artur Aligjoni nuk ka bërë përgjegjës asnjërin nga të shoqëruarit për plagosjen e tij, në dëshminë që dha në polici.
Pronari dhe menaxheri i disa lokaleve ka dëshmuar para oficerëve të Policisë, por nuk ka bashkëpunuar, duke u shprehur se nuk e di kush e ka qëlluar me armë, shkruan “Panorama”.
I pyetur konkretisht rreth problemeve që ai ka pasur disa muaj më parë me shtetasin Halim Hysa, i cili po ashtu u plagos shtatorin e vitit të kaluar, 41-vjeçari e ka përjashtuar nga kjo histori, shkruan “Panorama”.
Sipas dëshmisë së Aligjonit, nuk ka më asnjë konflikt me 33-vjeçarin Hysa, duke thënë se problemet mes tyre janë sheshuar.
Në këto kushte, por edhe duke mos pasur asnjë provë konkrete për të mbajtur të ndaluar 5 personat e shoqëruar, Policia është detyruar t’i lirojë pasi u ka marrë deklarimet. Nga ana tjetër, të njëjtin version si i plagosuri ka dhënë edhe shtetasi Halim Hysa, pronar e instruktor i një palestre në zonën e Institutit, në Kodër Kamzë, shkruan “Panorama”.
Policia e Tiranës shoqëroi disa persona të dyshuar për plagosjen e biznesmenit Artur Aligjoni në zonën e ishBllokut, në Tiranë, por ende nuk ka asnjë autor të ndaluar.
Burimet thanë se kanë dyshime që Aligjoni nuk ka dëshirë të flasë mbi ngjarjen dhe po u shmanget hetimeve. Raportohet se hetuesit tashmë janë përqendruar në marrjen e informacioneve dhe të dhënave të tjera që lidhen me atentatin e së shtunës.
Aligjoni u plagos dy ditë më parë me një plumb pistolete në këmbë, pas një atentati që u organizua ndaj tij në rrugën “Ismail Qemali”, në zonën e ish-Bllokut.
