U mblodh sot komisioni hetimor parlamentar mbi privatizimin e OSHEE-së tek kompania çeke “CEZ”. Që në nisje të seancës, kryetari i komisionit Taulant Balla ka kërkuar sjelljen me forcë të dëshmitarit Nuel Kalaj, i konsideruar si sekser mes qeverisë shqiptare dhe grupit çek. Kalaj ka lënë vendin dhe nuk u paraqit në komision.
Balla ka lexuar disa mesazhe elektronike të shkëmbyera mes Kalajt dhe çekëve në Shqipëri dhe në Pragë.
“Këto email-e duhen përkthyer pasi përmes tyre mund të hedhim dritë mbi disa ngjarje. Është me rëndësi që asnjë parti politike të mos e marrë në mbrojtje dëshmitarin”, tha ai.
Më pas Balla lexoi një nga email-et, që sipas tij tregon se si kompania çeke u favorizua duke lehtësuar kriteret përzgjedhëse. “Në mënyrë të çuditshme, borxhi i keq për CEZ ndryshoi nga 4 në 14 për qind, në dëm të shtetit shqiptar”, tha Balla.
Sipas Ballës në këtë email citohen edhe kryeministri i atëhershëm Sali Berisha dhe djali i tij Shkëlzen Berisha. “Berisha është larguar nga Shqipëria më 28 janar dhe ne do të vërtetojmë nëse është larguar me të vërtetë”, tha Balla.
Duke nënvizuar se do të bëhen kontrolle edhe për transfertat bankare të bëra mes CEZ dhe sekserit Kalaj. Po ashtu do të kontrollohen edhe lëvizjet e tij përmes mbikëqyrjes së sistemit TIMS. “Për të verifikuar nëse paratë e tërhequra kanë mbetur në Shqipëri apo janë nxjerrë jashtë me çanta”, tha Balla. Balla tha se nëse Kalaj nuk paraqitet me dëshirë në komision do të merret me polici.
Deputeti i opozitës në këtë komision, Ritvan Bode i ka bërë thirrje kryetarit Balla që të mos dalë në përfundime të parakohshme. Sipas tij duhen dëgjuar më parë dëshmitë e personave të përfshirë në çështje.
“Keni bërë hero një personazh, Nuel Kalaj, dhe po flisni në të gjitha televizionet për të, por s’po e sillni dot për të deponuar. Le të marrim edhe drejtorin e CEZ këtu e të thotë përse i ka dërguar këto para. Nuk mund të supozojmë ne se Haçeku ia ka dhënë Nuel Kalajt këto para për këtë apo për atë arsye. Thirreni këtu të deponojë”, tha Bode.
Më pas lidhur me akuzat që bëri Balla për ndryshimin e nivelit të borxhit të keq, Bode tha se sot borxhi i keq i kompanisë ka arritur në 25 për qind, kuotë shumë më e lartë kjo nga niveli i mëparshëm. Kur sipas Bodes nuk ishte mbi 10 për qind dhe jo 14 për qind sikurse deklaroi Balla.
