Partia Demokratike u bën thirrje institucioneve publike dhe private të mos pengojnë punën e komisionit hetimor për inceneratorët, por të japin pa vonesë çdo informacion të kërkuar nga opozita.
Në mbledhjen e fundit të komisionit, u bë e ditur se, tre banka të nivelit të dytë kanë refuzuar dhënien e informacioneve të kërkuara nga komisioni hetimor parlamentar për inceneratorët për llogaritë bankare të Mirel Mërtirit.
Në një reagim, deputetja demokrate Ina Zhupa kujton se që prej mesit të vitit 2017 “kemi denoncuar dhe publikuar çdo detaj të transaksioneve mafioze të qeverisë për këtë superaferë korruptive”.
“PD u tregoi shqiptarëve për 4 vjet me radhë së paratë e taksave të tyre, 430 milionë euro, po shkonin në parajsa fiskale, në incineratorë që nuk ekzistojnë, në kryeveprën e korrupsionit të Edi Ramës. PD ka dorëzuar disa kallëzime penale në SPAK kundër Edi Ramës, Arben Ahmetajt, Erion Veliajt, Lefter Kolës, Klodian Zotos dhe Mirel Mërtirit. Ne, si përfaqësues të PD jemi përplasur me ortakët e Edi Ramës tek incineratorët dhe sot jemi në gjyq me ta. Ndërtimi i incineratorëve më Tiranë, Fier dhe Elbasan, ka patur si kundërshtar vetëm 1 ministër të qeverisë së Edi Ramës. Shkëlqim Cani u largua nga detyra e Ministrit të Financave vetëm pse kundërshtoi incineratorët. Çdo ministër tjetër i qeverisë së Edi Ramës, përfshirë 2 nga ministrat e LSI-së tek Mjedisi dhe Drejtësia, kanë punuar, kanë pranuar dhe kanë votuar për ndërtimin e incineratorëve”, shprehet Zhupa.
“PD do ta vazhdojë këtë betejë, që e bën e vetme prej më shumë se 4 vjetësh, për t’u treguar shqiptarëve se një qeveri që vjedh votat e tyre, vjedh edhe taksat e tyre. Një qeveri e tillë meriton vetëm të largohet”, përfundon ajo.
