Presidenti Ilir Meta ka njoftuar sot mbajtjen e një konference për mediat, në një kohë kur ndodhet nën akuzat e kreut të PD-së, Lulzim Basha, i cili së fundmi e ka cilësuar fushatën e Kreut të Shtetit për zgjedhjet e 25 prillit si në favor të Kryeministrit Edi Rama.
Nuk dihet nëse Meta do të preferojë t´i përgjigjet flakë për flakë akuzave të Bashës, ndërsa në njoftimin zyrtar nga Presidenca thuhet se Presidenti në ora 17:30, do japë një konferencë për mediat, në ambientet e Institucionit të Presidentit.
Konferenca e Metës vjen pas vendimit të SPAK për të pushuar hetimet për Ardian Dvoranin, ish-kreun e KED-së, ndaj të cilit presidenti kishte ngritur padi.
Nuk dihet nëse Kreu i Shtetit do të mbajë një qëndrim lidhur me kërkesën e SPAK për të pushuar hetimet ndaj Dvoranit apo jo, por ish-kreu i KED prej kohësh ka qenë në akuzat e vazhdueshme të Presidentit.
