Kanë mbërritur edhe dëshmitë e para nga Brukseli, nga njerëzit që ishin në metronë e Molembekut dhe Aeroportin e Brukselit, ku ndodhën shpërthimet terroriste mëngjesin e sotmë.
Një prej personave që ishte në metro mes lotëve tregon: “Isha diçka më shumë se 30 metra larg vendit ku shpërtheu bomba. Tre pjesëtarë të familjes time janë ende aty. Jemi duke pritu ndihmë, por nuk ka makina, barrela nuk ka më asgjë…”.
Një tjetër tregon se shpërthimet kanë ndodhur në dy ekstremet e metrosë: “Njëri shpërthim ndodhi majtas, e tjetri djathtas brenda në metro. Për fat, ambulancat dhe policia mbërritën menjëherë”.
Dëshmitari tjetër tregon se “isha 100 metra nga shpërthimit dhe ishte një tmerr”. Shoqja e tij rrëfen më pas: “Të gjithë ishin në panik, ishte tronditëse, fëmijët qanin, por tani gjithçka ka mbaruar dhe ne jemi këtu dhe kjo është e rëndësishme”.
Më i saktë në rrëfimin e tij është Alfonso, punonjësi i sigurisë së aeroportit të Brukselit, i cili është kthyer në heroin e ditës në kryeqytetin e Europës, pasi u ka shpëtuar jetën të paktën 7 personave.
“Kishte një goditje dhe më pas një njeri filloi duke bërtitur në gjuhën arabe dhe më pas … buum një shpërthim i madh. Njerëzit vraponin drejt ashensorëve. Dy të moshuar erdhën drejt meje. I shpëtova duke i vendosur në ashensor, por nuk donin të më linin të ikja. Donin që të zbrisja me ta. Por nuk mundesha. Kishte shumë rrëmujë. U ktheva pas për të shpëtuar njerëz të tjerë”.
Ndwrsa një tjetër dëshmitar që ka qenë shumë pranë shpërthimit tregon si i dha ndihmën e parë. “Bashkë me një shokun tim ishim në garazh pranë stacionit të metros. Më pas dëgjova që njerëzit bërtisnin dhe vrapuam duke ndihmuar njerëzit e dëmtuar. Ishim të parët që i shkuam në ndihmë. Nuk mund t`ju përshkruaj dot situatën që u krijua atje. Të bërtiturat dhe ulërimat e njerësve. Ishin imazhe shokuese. Pashë edhe një vajzë të vogël të djegur. Ulërisnin pasi dhe ishin djegur. U përpoqa t`i ndihmoja sa më shpejt. Të merrja ambulancat. U dhamë një dorë edhe mjekëve të urgjencës”, rrefen ai.
