Në Partinë Demokratike vijojnë debatet, ndërsa ish-Kryeministri Sali Berisha dhe mbështetës të tij, kanë deklaruar mbledhjen e Kuvendit Kombëtar të kësaj partie më 11 dhjetor.
Nga raportimet mësohet se mbi 65 % e delegatëve të Kuvendit të fundit të kësaj partie kanë firmosur peticionin në mbështetje të nismës së ish-Kryeministrit, i cili gjithashtu ka deklaruar se kjo mbledhje do të miratojë ndryshimet në statut, që sipas tij, do të rikthejnë vendimmarrjen institucionale.
Gjithsesi ky Kuvend pritet të shënojë edhe nisjen e një procesi organizativ të gjithanshëm të strukturës qendrore të PD, ku ndoshta për herë të parë mund të legjitimohen edhe fraksionet, bazuar në rregulla.
Ndërkohë në anën tjetër, kreu demokrat, Lulzim Basha, përveç atakimeve në distancë me ish-Kryeministrin, për të cilin ka thënë se po shërben si tub oksigjeni për Kryeministrin Edi Rama, nuk ka ripërsëritur qëndrimin se nuk do të lejojë mbledhjen e forumeve të PD, përfshi edhe Kuvendin Kombëtar.
Që Kuvendi të mund të mblidhet, duhet firma e të paktën 1/4 të anëtarëve, dhe paralelisht me fotloren, Berisha ka mbledhur disa fish më tepër firma.
Pasditen e djeshme u raportua lidhur me një takim që Basha i ka kërkuar kreut të Këshillit Kombëtar të PD-së, Edi Paloka, i cili ka konfirmuar takimin, por nuk ka dhënë detaje.
“Po është e vërtetë që më ka kërkuar që të takohemi, nuk ka asnjë sekret, se kanë qenë dhe gazetarët aty. Se çfarë është biseduar nuk e kam bërë publike, dhe nuk ia kam thënë as ndonjë gazetari privatisht”, u shpreh Paloka.
Paloka ka shmangur komentet për atë që po ndodh brenda PD-së, ndërkohë që vetë ai ka dalë publikisht në mbështetje të ish-kryeministrit Sali Berisha.
Mes funksionarëve aktualë të PD ka nisur të hidhet ideja që firmat e mbledhura duhet të jenë të noterizuara dhe duket se në këtë linjë kreu demokrat mund të ketë trajtuar edhe çështjen.
Gjithsesi në një proces të tillë, kur kanë kaluar shumë pak muaj nga mbledhja e Kuvendit të fundit Kombëtar, dhe kur delegatët janë të njëjtët me ato që në korrik u mblodhën dhe votuan për ndryshimet në statut të propozuara nga Basha, apo për anëtarët e Këshillit Kombëtar, nuk është e vështirë për të identifikuar delegatët.
