Prokuroria e Posaçme ka dërguar në gjykatë dosjen për rrëmbimin dhe vrasjen e Jan Pengës. Ky i fundit u rrëmbye mesditën e 17 janarit të vitit 2020 në Kamëz.
SPAK ka ngritur akuza për shtatë persona, ndërsa ka kërkuar pushimin e hetimeve për pesë të akuzuar të tjerë.
Hetimet
Referuar dosjes hetimore, Jan Penga u rrëmbye me urdhër të dy të burgosurve jashtë vendit për një konflikt droge.
“Të pandehurit Dritan Rexhepi, i cili aktualisht rezulton të jetë i burgosur në shtetin e Ekuadorit dhe Gentjan Funiqi (Doçaj) me precedentë penal në fushën e narkotikëve, në fund të muajit dhjetor 2019 kanë urdhëruar rrëmbimin e viktimës, Jani Prenga, me banim në Kamëz, Shqipëri. Kjo, pasi sipas tyre, shtetasi Astrit Prenga, vëllai i viktimës ka vjedhur një sasi kokaine në Portin Portsmouth, Angli, që ju përkiste atyre, e cila ishte importuar nga Ekuadori në Angli. Ky rrëmbim është urdhëruar prej tyre me qëllim që Astriti dhe personat e tjerë të kthenin lëndën narkotike. Ndërsa organizimi i rrëmbimit është kryer nga të pandehurit Martin Bleta e Korado Keshteja, ekzekutimi i këtij rrëmbimi është kryer në Shqipëri, në datën 17.01.2020, nga të pandehurit Artan Doçaj, Aldo Majnishta, Geraldo Martini dhe një person tjetër i paidentifikuar. Ndërkohë, hetimet vazhdojnë në lidhje me identifikimin, grumbullimin, si dhe sigurimin e provave në kuadër të një hetimi të plotë e të gjithanshëm për personat e tjerë që janë të përfshirë në këtë ngjarje”, njoftoi SPAK.
Akuzat
SPAK zbardhi edhe akuzat që rëndojnë ndaj personave nën hetim.
Dritan Rexhepi, Gentjan Funiqi, Martin Bleta dhe Korado Keshteja, akuzohen për kryerjen e veprave penale ‘Rrëmbim apo mbajtje peng e personit’ kur është shkaktuar vdekja,‘Mbajtje pa leje e armëve luftarake’, ‘Fshehja dhe asgjësimi i kufomës’,‘Grupi i strukturuar kriminal’ dhe ‘Kryerja e veprave penale nga organizata kriminale dhe grupi i strukturuar kriminal’.
Artan Doçaj, Aldo Majnishta dhe Geraldo Martini, akuzohen për kryerjen e veprave penale ‘Rrëmbim apo mbajtje peng e personit’ kur është shkaktuar vdekja, ‘Mbajtje pa leje e armëve luftarake’, ‘Fshehja dhe asgjësimi i kufomës’, ‘Grupi i strukturuar kriminal’ dhe ‘Kryerja e veprave penale nga organizata kriminale dhe grupi i strukturuar kriminal’.
Gjithashtu, Prokuroria e Posaçme ka kërkuar pushimin e akuzës për personat nën hetim Bajram Hajri, Leonard Hajri, Elton Hajri, Aleks Doçaj dhe Ardian Doçaj, pasi sipas prokurorisë, nuk ka prova që i inkriminojnë.
