Sezoni ka nisur në mënyrën më të keqe për Partizanin. Skuadra e drejtuar nga Ilir Daja në 7 javë kampionat ka marrë 5 barazime dhe dy humbje, ndërsa nuk ka shijuar ende fitoren e parë. Sikur të mos mjaftojnë vetëm rezultatet pozitve, Partizani ka edhe një “luftë” me Federatën Shqiptare të Futbollit.
Së bashku me Teutën, të kuqtë janë dy ekipet e vetme që kanë refuzuar të mbajnë logon e re “Abissnet Superiore” në fanellat e tyre. Përveç se nuk pranojnë ta vendosin logot në bluze, sot në ndeshjen Partizani-Egnatia në “Air Albania” e mbyllur në barazim 1-1, të kuqtë te reklamat anës fushës kishin vendosur logon e vjetër të kampionatit si dhe me emrin “Kategoria Superiore”.
FSHF-ja në fillim të sezoni arriti akordin me “Abissnet” që bleu të drejtat e Superligës dhe vendosi që Kategorinë Superiore ta quante “Abissnet Superiore. Te Partizani siç duket vazhdojnë “luftën” me FSHF-në dhe vazhdojnë të marrin nga 500 mijë lekë të vjetra gjobë javë për javë së bashku me Teutën. Nuk dihet se për çfarë arsye Partizani dhe Teuta nuk pranojnë të vendosin logot e sponsorit të ri pasi nuk kanë bërë asnjë reagim zyrtar, por vazhdojnë të paguajnë gjobat javë pas jave nga Disiplina.
