Kuvendi nis sot procedurat lidhur me ndryshimet Kushtetuese të propozuara nga Partia Socialiste për zgjatjen e afateve të organeve të vetting.
Sipas një njoftimi zyrtar, sot (e hënë 1.11.2021) nën drejtimin e kryetares së Kuvendit, do të thirret mbledhja e përbashkët e Këshillit të Legjislacionit dhe Komisionit për Çështjet Ligjore, Administratën Publike dhe të Drejtat e Njeriut, ku do të prezantohet nisma e një grupi prej 39 deputetësh të shumicës parlamentare ‘Për një ndryshim në ligjin nr. 8417, datë 21.10.1998 ‘Kushtetuta e Republikës së Shqipërisë’, të ndryshuar”, thuhet në njoftimin e zyrës së shtypit të Kuvendit.
Miratimi i ndryshimeve të propozuara nga socialistët kërkon minimalisht 93 vota, ndërkohë që socialistët kanë vetëm 74 të tilla, pa përfshirë këtu 3 votat e PSD-së. Pra në total socialistët e Ramës dhe 3 deputetët e Tom Doshit arrijnë 77 vota, çka do të thotë se duhen minimalisht 16 vota të opozitës për të miratuar ndryshimin.
Në anën tjetër Partia Demokratike nuk ka dalë me një vendim të prerë politik, nëse zgjatja e afateve të organeve të Vetting duhet bërë apo jo. Deklaratat e deritanishme nuk janë as kundërshtim dhe as miratim, ndërsa në anën tjetër PD ka depozituar një draft me propozimet e saj lidhur me ndryshimet Kushtetuese, vettingun e politikanëve, si dhe reformën zgjedhore dhe atë territoriale.
Përsa i takon propozimit të PS-së, demokratët e drejtuar nga Lulzim Basha, janë shprehur se kjo nuk është një çështje emergjente, duhet analizuar, por pa u shprehur qartazi se çfarë qëndrimi do të mbajnë. Në rastin e miratimit të reformës në drejtësi, deputetët u vunë nën presionin ndërkombëtar duke votuar draftin e ndryshimeve Kushtetuese, ndërsa përsa i takon zgjatjes së organeve të Vetting, nuk dihet nëse diplomatët do të angazhohen sërisht për të siguruar votat e nevojshme.
Në deklaratat publike, Kryeministri Edi Rama, është shprehur se nuk ka marrëveshje për çështjen e shtyrjes së afateve të organeve të vettingut duke lënë për të kuptuar se PD është e detyruar që të dakordësohet në këtë çështje.
Rama është shprehur se për çështjet që ka propozuar është i gatshëm të ulet në dialog me përfaqësuesit e PD, ndërsa lidhur vettingun e drejtësisë, ai ka mbajtur një qëndrim të prerë, veçanërisht pasi pro zgjatjes së afateve janë pozicionuar edhe ambasadorja amerikane Yuri Kim dhe ambasadori i BE, Luigi Soreca.
Zgjatja e afatit të mandatit të KPK-së dhe KP-së, sipas propozimit të nismës ligjore, do të ishte dhe në përputhje me rekomandimet e Komisionit të Venecias në opinionin CDL-AD (2016)009 në situatën aktuale; ndërsa vazhdimi i rasteve nga Këshillat do të binte ndesh me këtë opinion pasi afati i përfundimit të procesit është më i gjatë se zgjidhja e propozuar nëpërmjet nismës.
Anëtarëve të Këshillave dhe SPAK u mungon përvoja përkatëse në procesin e rivlerësimit dhe do duhet të familjarizohen me këtë proces për konsolidimin e procedurave të hetimit administrativ dhe garantimin e një procesi të rregullt ligjor. Në këto kushte, ekziston edhe rreziku i krijimit të mospërputhjeve, pra standarde të ndryshme për vlerësime të ndryshme, thuhet ndër të tjera në argumentet që japin socialistët për zgjatjen e afateve të organeve të Vetting.
