Kryeministri Edi Rama paralajmëroi këtë të Premte se guroret kanë afat deri në fund të vitit për të rikuperuar mbjelljen e pemëve sipas kontratave, ose do të mbyllen.
Rama zhvilloi një takim me kryetarë të bashkive në kryeministri lidhur me administrimin e Ujësjellës-Kanalizimeve, ku edhe paralajmëroi një mbledhje të radhës lidhur me çështjen e guroreve.
“Nuk ka asnjë letër nga ana e bashkive në Ministrinë e Mjedisit ku të thuhet se kjo kompani që po shfrytëzon këtë gurore nuk ka mbjellë asnjë pemë. Nuk ka asnjë ngritje shqetësimi dhe për sa i përket guroreve, do iu lutesha t’i qëndroni larg kësaj pune. Këtu, herën tjetër, shumë shpejt do jenë kompanitë që shfrytëzojnë malet dhe ju si bashki do i qëndroni larg kësaj pune. Sepse ato ndërhyrjet sociale mbajnë erë të keqe për fat të keq. Ose do pranojnë kalendarin e pyllëzimit, ose do mbyllen të gjitha pa përjashtim. Duhet të marrim përsipër të pyllëzojmë sipas kontratës dhe pastaj mund ta vazhdojnë punën. Për këtë kanë afat deri në datën 31 dhjetor. Nëse janë të gatshëm të rikuperojnë nuk kemi asnjë arsye t’u bëhemi pengesë. Nuk ka asnjë rrugë tjetër”, deklaroi Rama.
Lexo edhe:
Rama paralajmëron riorganizim të ndërmarrjeve te Ujësjellësve, nxin Dritan Lelin
