Kategoria Superiore në Shqipëri mbylli javën e gjashtë. Tej rezultateve, trajnerët dhe drejtuesit e dy klubeve kanë kërkuar që të shpallen “non grata” dy arbitra.
Në Korçë, Dinamo mori tri pikë falë një goli të diskutuar dhe papranuar nga trajneri i Skënderbeut, Memelli. Korçari në deklaratën e pasndeshjes ishte i revoltuar, duke thënë se “kusuret i vijnë nga arbitrat”.
Trajneri i Skënderbeut ka kërkuar që skuadra e tij mos arbitrohet më nga Andi Koçi, kryesor në atë takim. Një tjetër arbitër që është kontenstuar javën e gjashtë, ka qenë edhe Eldorjan Hamiti. Lezhjani arbitroi derbin mes Tiranës dhe Partizanit, fituar 1-0 nga bardheblutë. Këtë herë ka qenë drejtori i Demave, Olsi Rama, që ka “ngelur në klasë” arbitrin.
Teksa duhen edhe tre javë nga fundi i fazës së parë, deri tani janë dy arbitra që janë shpallur të padëshiruar nga klubet. Me këto rritme, fundi i sezonit duket i zymtë për “bilbilat”.
