Ministrja e Shëndetësisë Ogerta Manastirliu kërkon riorganizimin e inspektorateve dhe forcimin e kontrolleve anti-COVID në territor.
Manastirliu ka zhvilluar një takim me drejtuesit e Inspektoratit Shtetëror Shëndetësor duke ua bërë të qarta kërkesat.
“Me drejtuesit e Inspektoratit Shtetëror Shëndetësor kërkova riorganizimin e strukturave të inspektimit në territor, në funksion të monitorimit të zbatimit të masave antiCovid si dhe forcimin e kontrolleve në strukturat e ofruesve të shërbimeve publike dhe jo publike me qëllim garantimin e standardeve të cilësisë”, shprehet Manastirliu.
Prej shtatorit, me hyrjen e stinës së vjeshtës në Shqipëri janë rritur numrat e të infektuarve dhe viktimave. Duket se Ministria e Shëndetësisë e shikon vendosjen nën kontroll të pandemisë vetëm me kontrolle, ndërkohë që hapi më thelbësor mbetet shtimi i testimeve dhe gjurmimi i rasteve. E ndërsa në muajt e parë të pandemisë mund të pranohej justifikimi për mungesat e testeve, sot në pothuajse të gjithë Europën testimet po shiten lirshëm në farmaci me çmime minimale, ndërkohë që në Shqipëri vijojnë çmimet e larta të testimeve dhe ka një kufizim të numrave të testuar.
Testo, gjurmo, trajto, prej më shumë se 1 viti po aplikohet si strategji në shumë prej vendeve më të zhvilluara, ndërkohë që në Shqipëri shpresat për vendosjen e pandemisë nën kontroll janë te forca policore, apo përmes shtimit të kontrollit për zbatimin e masave.
