Të tjera detaje janë zbuluar nga vrasja e një 45-vjeçari në Peqin, trupi i pajetë i të cilit u gjet në afërsi të lumit Shkumbin.
Viktima ka dy plagë me armë zjarri, përkatësisht një pas shpinës dhe një anësore nga brinjët.
Dyshimet e para janë se viktima mund të jetë ekzekutuar mëngjesin e sotëm, ose në orët e vona të së shtunës. Viktima nuk është identifikuar ende dhe nga raportimet dyshohet se ai nuk është banor i Peqinit.
Policia e Peqinit/ Informacion paraprak
Në lagjen Çezmë, Peqin, në afërsi të lumit Shkumbin, është gjetur i vrarë me armë zjarri, në rrethana ende të paqarta, një shtetas rreth 45 vjeç, ende i paidentifikuar.
Në vendngjarje kanë shkuar shërbimet e Policisë, të cilat vijojnë krehjen e zonës.
Grupi hetimor, nën drejtimin e Prokurorisë së Rrethit Gjyqësor Elbasan, vijon punën për identifikimin e viktimës, zbardhjen dhe dokumentimin e rrethanave të ngjarjes, me qëllim identifikimin dhe kapjen e autorit/ve.
