Personi që u mor dhe mbajt peng për disa orë në kryeqytet nga disa persona mësohet se është një këngëtar dhe instrumentist dasmash dhe lokalesh me muzikë turbofolk.
Një prej pengmarrësve është arrestuar tashmë nga komisariati i policisë nr.3.
Bëhet me dije se Adrian Uka, 36 vjeç, banues në rrugën e Durrësit në Tiranë, si dhe Elton Moriseni, 35 vjeç nga Elbasani, banues në Xhafzotaj të Durrësit, mbrëmjen e 6 janarit, kanë marrë në veturë me forcë 30-vjeçarin Ardian Kazanxhi.
Nga hetimet mësohet se fillimisht dy personat i kanë thënë muzikantit se e donin për të luajtur muzikë dhe për të kënduar për ta në një lokal nate në zonën e Laprakës. Por edhe pse pa dëshirë, Kazanxhi, ka pranuar të shkojë.
Sakaq pasi ka luajtur disa orë muzikë, Kazanxhi i ka kërkuar të largohet dhe të paguhet, por nuk është lejuar dhe është goditur me grushte dhe shkelma nga Moriseni dhe Uka. Këta të fundit pas disa orësh e kanë lënë të lirë këngëtarin, por pa e paguar.
Elton Kazanxhi ka bërë denoncim në komisariatin nr.3 për ngjarjen dhe policia arrestoi Adrian Ukën. Ky i fundit ka thënë në polici se ishte konfliktuar me te pasi i kishte ngacmuar të dashurën. Pretendim që është hedhur poshtë nga 30-vjeçari Kazanxhi.
