Partia Socialiste ka dërguar në kuvend një projektligj me anë të së cilit kërkon zgjatjen e mandatit të organeve të KPK dhe Komisionerit Publik deri në 31 dhjetor të vitit 2024.
Megjithëse, ende nuk është publik në faqen zyrtare të Kuvendit, amendamenti kushtetues që parashikon zgjatjen e afatit te Komisionit të Pavarur të Kualifikimit dhe Komisonerit Publik deri në 31 dhjetor 2024 (kohë kur socialistët parashikojnë mbylljen e procesit të vetingut të gjyqtarëve e prokurorëve) është dorëzuar tashmë në Parlament. Raportohet se amendamenti kushtetues u mbështet me mbi 28 firma të deputetëve socialistë.
Për këtë, maxhoranca kërkon edhe votat e opozitës, pasi ndryshimet kushtetuese miratohen me 93 vota pro.
Lidhur me nismën foli sot edhe kryeministri Edi Rama, i cili tha se “reforma në drejtësi nuk është diçka për t’u negociuar” dhe “kush i bie ndesh interesave të Reformës në Drejtësi i bie ndesh vendit, dhe aleatëve ndërkombëtar”.
