Dy shqiptarë janë shpallur në kërkim ndërkombëtar nga Policia e Malit te Zi pasi dyshohen si personat që kanë kryer një vrasje më 4 korrik të këtij viti, në Ulqin. Vincenc Pirolli, 34 vjeç dhe Dorjan Lala, 35 vjeç janë të dyshuarit kryesorë të vrasjes së malazezit nga Ulqini Momçillo Gjurishiç (Momčilo Djurišić).
Shefi i Sektorit kundër kriminalitet dhe korrupsionit Aleksandar Boshkoviç, në konferencën për media u shpreh se: “Zyrtarët e sektorit kundër krimininalitetit nga Policia e Ulqinit dhe e Tivarit ne Mal të Zi kane kallëzuar penalisht ndaj dy shtetasve shqiptarë Vinçenc Pirolli 34 vjeç, dhe Dorjan Lala 35 vjeç, të cilët janë të dyshuarit kryesorë për vrasjen e Momçillo Gjurishiçit me 4 korrik 2021 në Ulqin”.
Boshkoviç ka shtuar se “gjatë hetimit janë dokumentuar prova te mjaftueshme që janë shfrytëzuar gjate largimit nga vendi i ngjarjes, si dhe është zbuluar drejtimi i arratisë së tyre”.
Sipas së përditshmes “Vijesti” në Mal të Zi, dyshohet se këta persona kanë kryer vrasje me qëllim gjakmarrjen. Shefi i policisë kriminale Boshkoviç është shprehur se “Kemi dyshime që mund të jetë kryer për hakmarrje por nuk kemi fakte konkrete”.
Ai gjithashtu ka theksuar se në bazë të të dhënave dy shqiptarët në territorin e Malit te Zi janë futur ilegalisht dhe se po të njëjtën ditë që është kryer vrasja janë larguar në drejtim të Shqipërisë përmes pikës së kalimit kufitar Sukobine-Muriqan.
Boshkoviç, në konferencën për shtyp, ka thënë se të gjitha të dhënat e grumbulluara kanë kryer në bashkëpunim me kolegët nga Shqipëria.
Vrasja e 68-vjeçarit Momçillo Gjurishiç dyshohet se ka ardhur si pasojë e vrasjes së kryer në Mars 2017, kur djali i tij Savo Gjurishiç vrau me armë zjarri shtetasin nga Kosova Beqë Likaj, 53 vjeç. Momçillo Gjurishiç është gjetur i vdekur në lokalin e tij në Ulqin pasditen e 4 Korrikut.
