Nga Boldnews.al
Në mbledhjen e qeverisë shumë vendime të mëdha u morën. E para dhe më kryesorja është që do të rritet çmimi i energjisë, pas rritjes edhe të çmimit të bukës, të karburanteve dhe ushqimeve. Për të përballuar me “sukses” këtë nismë të qeverisë sonë, u caktua në krye të punëve Arben Ahmetaj, i cili do të hartojë planin “ja zbarazim xhepat shqiptarëve të pasur dhe ndihmojmë qeverinë e varfër”.
Vetë ai, “Tigri i Rilindjes” ose i njohur ndryshe si “ministri i fatkeqësive”, i pasojave të tërmetit dhe pandemisë, tani ka marrë një post fort të rëndësishëm, jo vetëm si nënkryeministër, por edhe si menaxher i parave që vijnë nga xhepat e qytetarëve në arkën e pu-shtetit. Shumë shpejt do të bëhet publike niveli i rritjes së çmimit të energjisë elektrike, që do të prekë çdo familje shqiptare. Se ku do i gjejnë paratë që do të paguajnë qytetarët le ta gjejnë vetë zgjidhjen, por qeveria e ka zbuluar se ne kemi para, madje edhe kemi kuryser duke “mashtruar” qeverinë.
“Një pjesë e madhe dhe kryesisht ata që qahen më shumë, janë ata që kanë më shumë të ardhura se sa tregojnë. Mos ta harrojmë dhe këtë. Nëse i besojmë të ardhurave të deklaruara, shumëçka nuk do të shkonte si shkon. Shqipëria ka sasinë më të lartë të kursimeve, depozitave të vogla”-tha kryeministri Edi Rama. Pra, sipas tij ne jemi të pasur dhe këtë nuk e kemi ditur dhe na e tregon sot qeveria. Si “qytetarë të pasur” duhet të kontribuojmë, së pari në të mirë të qeverisë e cila është tretur shumë pasi derdhi shumë para për fushatën e zgjedhjeve dhe më pas edhe të shoqërisë.
Për të na i marrë ato shuma të “mëdha” kursimi ka menduar nikoqiri i Rilindjes, Arben Ahmetaj, i cili në më tepër se tetë vite është gjithnjë pranë kryeministrit dhe sa herë shfaqet ndonjë krizë ai është aty, si një Qehaja që mbledh taksat për Beun e vendit.
Çdo gjë do të rritet, por ne kemi një qeverisje të dhembsur dhe ka vendosur që të mos vendosur taksë për ajrin. Deri më tani nuk i ka shkuar në mendje për një taksë të tillë, por kjo nuk do të thotë se në mënyrë indirekte edhe kjo na vilet. E vjel bashkia, kur merr taksën e gjelbërimi dhe ngre kulla, apo taksën e përkohëshme të arsimit e cila u kthye në taksë të përhershme.
Dhe ne sërish nuk ndihemi. Kur të na grijë uria dhe të kontrollojnë paratë në xhep që na janë marrë nga taksat dhe çmimet e rritura, sërish nuk duhet të biem në pesimizëm. Hapni televizorin dhe me siguri në çdo orë do të shfaqet kryeministri Edi Rama dhe anëtarët e tjerë të kabinetit që do na mbushin mendjen, por jo barkun me ushqimin e propagandës.
Duke e përsëritur shpesh me veten disa herë: “jemi të pasur, jemi të ngopur, jemi mirë se ka edhe më keq”, do të ndihemi më të lumtur. Sa të pasur jemi dhe nuk e dinim, por fatmirësisht për ne kemi një qeveri që na jep shpresë dhe na ushqen edhe kur luga e drurit është bosh, duke na treguar se “luga e floririt” që hanë të pushtetshmit është “iluzion optik”. Sukur propaganda qeveritare të ishte “mall”, vërtetë ne do ishim vendi më i pasur në Europë.