Albian Ajeti, disa vite më parë ishte i dyzuar mes Shqipërisë dhe Zvicrës. Sulmuesi i talentuar po shkëlqente me Bazelin dhe mori ftesë nga të dy përfaqësueset, duke zgjedhur në fund atë helvete, ndryshe nga sa kishte bërë vëllai i tij i madh, Arlindi.
Por siç u ka ndodhur shumë shpesh lojtarëve shqiptarë që zgjedhin Zvicrë në çdo moment me luhatje të formës, edhe ai po përballet me kritika. Të fundit vijnë nga Ramon Vega, ish-sulmuesi i përfaqësueses së Zvicrës, i cili ka luajtur te Sëlltik po ashtu siç po bën tani Ajeti. Ai ka deklaruar se nuk e kuptonte absolutisht grumbullimin e tij.
“Jam i çuditur që u grumbullua dhe sinqerisht nuk e kuptoj pse. Ai aktualisht luan te Sëlltiku vetëm sepse trajneri nuk ka opsione të tjera për shkak të dëmtimeve. Dhe nuk është as bindës. Ka pak lëvizshmëri, pak shpejtësi. Ka pak cilësi finalizimi të cilat i përdor rrallë. Nuk e kuptoj se çfarë lloj sulmuesi është. Ka luajtur kohët e fundit në klub vetëm sepse japonezi Kyogo Furuhashi ishte dëmtuar. Përndryshe do të ishte zëvendësues”, tha Vega për sulmuesin.
