“Bëj si them, por mos bëj si bën unë”. Shprehja po merr kuptim me rastin e masave anti-Covid, që vendosen nga zyrtarë, por nuk zbatohen prej tyre. Nga ana tjetër, qytetarëve u bëjnë apel për respektimin e tyre.
Një prej këtyre personazheve është edhe kryebashkiaku i Tiranës Erion Veliaj, i cili ka bërë thirrje publikisht në mënyrë të përsëritur për respektimin e masave anti-Covid. Ndërkohë, në aktivitetet që zhvillon, i shkel me të dyja këmbët.
Disa ditë më parë, ai ishte prezent në një event me personazhe të show-bizit. Në media dhe rrjetet sociale janë shfaqur fotografi ku kryebashkiaku pozon me të tjetër, pa maskë apo respektimin e distancës siç rekomandohet nga autoritetet shëndetësore. Në një foto madje, shfaqet duke i hedhur dorën në qafë njëri prej personave që ka pranë.
Janë disa raste që kryebashkiaku Veliaj është dokumentuar duke shkelur masat apo rekomandimet e autoriteteve shëndetësore lidhur me masat kundër parandalimit të përhapjes së koronavirusit.
Dhe kjo sjellje e Veliajt vjen në një kohë kur aktivitete të tjera thelbësore kufizohen për shkak të situatës së pandemisë.
Një prej tyre është mësimi me orar të reduktuar në shkolla, që është kthyer në një çështje shqetësuese për shumë nxënës e prindër. Këta të fundit shprehen të pakënaqur me vendimin e marrë nga institucionet e linjës. Së fundmi, një peticion po firmoset nga prindër të nxënësve në Tiranë, ku kërkohet që mësimi të kryer me orë të plota – 45-minuta. Sipas tyre, fëmijët e kanë të pamundur të përthithin informacionin që përmban programi lëndor përmes mësimit me orë të shkurtuara dhe për pasojë hasin probleme dhe mangësi në njohuritë e tyre. Madje, referuar peticionit, me zhvillimin e mësimit me orar të reduktuar “po shkelet e drejta themelore kushtetuese për arsim, bazuar në nenin 57 të Kushtetutës”.
