Nga Boldnews.al
Pas një “loje” që zgjati disa muaj, Emirjana Sako, ka firmosur që plehrat e Durrësit do të shkojnë në Sharrë. Një vendimmarrje tepër e dyshimtë, pasi gjatë këtyre javëve janë bërë disa procedura formale, që këto mbetje të transportoheshin në koncesionarin e Sharrës.
BoldNews.al ka siguruar dokumentin që kompania INTEGRATED ENERGY BV SPV është shpallur fituese e të ashtuquajturit “tender” nga Bashkai e Durrësit. Në fakt, fillimisht Sako akordoi 2.5 milionë euro, por kjo shumë nuk i pëlqeu koncesionarit. Më pas, akordoi 10 milionë euro, një shumë e kënaqshme.
Sipas dokumenteve, Bashkia e Durrësit ka shpallur në datën 27 shtator 2021, formularin e njoftimit të fituesit. Në dokumentin që publikuam më sipër, është njoftuar kompania “INTEGRATED ENERGY BV SPV” që është shpallur fituese e procedurës me negocim, pa shpallje paraprake të njoftimit të kontratës. Është një procedurë shërbimesh, me marrëveshje kuadër e lidhur me një operator ekonomik, ku të gjitha kushtet janë të përcaktuara.
Pra, aspak tender! Por, dërgim i parave direkt në llogarinë e koncesionarit. Objekti i procedurës është “Depozitimi i mbetjeve urbane, Bashkia Durrës”, ndërsa sasia e pritshme që do të depozitohen është 320.000 tonë, të cilat do të dërgohen për 48 muaj.
“Me anë të kësaj ju informojmë se ofertuesit e mëposhtëm kanë marrë pjesë në këtë procedurë me këto vlera përkatëse të ofruara: INTEGRATED ENERGY BV SPV, me vlerë të ofertës 1,126,035,200 lekë pa TVSH” thuhet në këtë dokument. Pra, ka pasur vetëm një kompani! Por, çfarë priste Sako, që në këtë procedurë të konkurronte edhe inceneratori i Elbasanit dhe Fierit? Apo landfilli i Bajkajt në Delvinë, i Maliqit apo i Bushatit?! Dhe, për më tepër, që oferta e koncesionarit të Sharrës është 100 % e vlerës së akorduar nga Sako.
Sipas dokumenteve që disponon BoldNews.al, në fund të muajit gusht 2021, Bashkia e Durrësit anuloi procedurën tenderuese për depozitimin e mbetjeve urbane. Njoftimi është bërë në Agjencinë e Prokurimit Publik, ku Emirjana Sako, u tërhoq nga tenderi. Redaksia jonë ka ndjekur këto procedura, ku me të drejtë ne e pyetëm publikisht Sakon nëse ishte një lojë, që i paraprinte marrëveshjes me këtë landfill.
“A u bë formalisht për të mbyllur gojët e liga dhe për të vijuar për t’i dërguar mbetjet në Sharrë me marrëveshje të drejtpërdrejtë me koncesionarin?” ishte njëra nga pyetjet, ku përgjigja me zhvillimet e fundit është se “PO”: Tenderi i parë u anulua për t’i hapur rrugë katërfishimit të vlerës! Pra, Bashkia e Durrësit nuk do të depozitojë në Sharrë vetëm plehra, por një “mal” me euro, ku vetëm në dy vitet e para do të paguajë plot 10 milionë euro.
