Ish-Kryeministri Sali Berisha prej të paktën dy javësh ka nisur një bashkëbisedim me anëtarët e Partisë Demokratike, pas vendimit të kreut demokrat Lulzim Basha, për t´a përjashtuar nga Grupi Parlamentar i PD.
Berisha e ka cilësuar vendimin e Bashës si një thikë pas shpine për çdo demokrat, ndërsa ka deklaruar se do të përdorë mekanizmat statutorë për thirrjen e Kuvendit të Jashtëzakonshëm Kombëtar të kësaj partie.
Për thirrjen e Kuvendit janë të nevojshme 1500 firma delegatësh, ose 15 % e tyre, ndërsa ish-Kryeministri ka mbajtur tre takime, një në Tiranë, një tjetër në Fier dhe dje në Vlorë, ku ka shpalosur qëndrimet e tij.
Ndërkohë mes anëtarëve të PD po qarkullon një kërkesë, e cila duhet të plotësohet dhe të firmoset, ku mbështetet thirrja e Kuvendit Kombëtar, ndërsa thekoshet se gjendja e demokracisë së brendshme në këtë parti është e rëndë, pasi janë dhunuar parimet themelore, statuti dhe forumet e partisë.
Po çfarë do të synohet me thirrjen e Kuvendit Kombëtar, në kushtet kur kreu demokrat Lulzim Basha ka deklaruar se nuk do të ketë asnjë mbledhje forumesh që do të analizojë vendimin e Qeverisë amerikane, apo sikundër është etiketuar një “Kuvend anti-amerikan”.
Në dokumentin e mëposhtëm janë 4 pika, që i propozohen Kuvendit Kombëtar, që nisin me ndryshimet statutore, për rikthimin dhe garantimin e demokracisë së brendshme, dhe përfundojnë me analizimin e qëndrimeve të kreut të PD-së, Lulzim Basha.
Pikat kryesore të propozuara
Miratimi i ndryshimeve statutore sipas propozimeve, konform nenit 43/4 dhe 60 të statutit të PD për rivendosjen dhe garantimin e demokracisë në vendimmarrjen në forumet e Partisë Demokratike.
Analiza e qëndrimeve të Kryetarit Basha ndaj parimeve themelore e normave të statutit, si dhe forumeve të PDSH.
Vendimmarrje sipas ndryshimeve statutore të propozuara dhe thirrja e referendumit të anëtarëve për të miratuar vendimet e Kuvendit Kombëtar.
Përcaktimi i aksionit politik opozitar.
