Epidemiologu Ilir Alimehmeti pohon se nuk ka arsye mjekësore që adoleshentët e shëndetshëm të vaksinohen.
“Nuk ekziston arsye për tu vaksinuar 15-vjeçarët, adoleshentet e shëndetshëm. Kemi një diskutim shëndetësor këtu, është tjetër gjë diskutimi administrativ. Arsyet janë: Fatmirësisht adoleshentët e kalojnë lehtë sëmundjen. Transmetueshmëria nuk është e madhe te adoleshentët, të rriturit janë problemi kryesor. Vaksina fatkeqësisht nuk eliminon transmetimin. Kujt do ja transmetojnë ata nëse prindërit, gjyshërit dhe mësuesit janë vaksinuar”, u shpreh Alimehmeti, në emisionin “Ditë e Re” në “RTV ORA”.
Ai foli edhe për vaksinimin e grave shtatzëna.
“Për gratë shtatzëna, studimet janë të qarta. Gruaja shtatzënë nuk duket të ketë ndonjë risk, përveç asaj që mund të ketë faktori moshë. Flamuj të kuq nuk ka. Periudha e vaksinimit është akoma më e shkurtër se periudha e lindjes. Të thuash efekte afatgjata nuk i themi dot, sepse është herët. Duhet të kuptojmë se ka kaluar pak kohë. Nuk dimë ende sa të sigurt jemi nëse ne vaksinohemi përpara dhe nëse duam të bëjmë fëmijë më vonë. Pra fëmijë i konceptuar nga dy prindër të vaksinuar. Potencialisht asgjë nuk ndodh. Por nuk duhet të harrojmë se kanë kaluar vetëm 8 muaj”, shprehet Ilir Alimehmeti.
Ndërkohë, Akademia e Shkencave shtron nevojën e një doze të tretë vaksine për moshat mbi 60 vjeç dhe vaksinimin e fëmijëve mbi 12 vjeç me një dozë vaksine.
Lexo edhe:
Pandemia/ Akademia e Shkencave: Duhet dozë e tretë për ata mbi 60 vjeç. Duhen vaksinuar edhe fëmijët
