Emrat e rinj të Asamblesë së PS në Tiranë kanë nxjerrë në pah përplasjet mes Saimir Tahirit dhe Erion Veliajt. Të dy sot kanë shkuar që në mëngjes në selinë e Partisë Socialiste, ku i prinin Edi Rama dhe Gramoz Ruçi.
Veliaj ka qenë i pakënaqur me rezultatin e votimeve për Tiranën dhe ka hedhur dyshime për një orientim të delegatëve të kryeqytetit për të votuar kandidatë të caktuar: një pjesë e mirë e kandidatëve të mbështetur prej tij nuk u votuan nga delegatët e Tiranës. Ervin Mete dhe Gentian Elezi, njëri zv/ministër i Financave dhe tjetri zv/ministër i Integrimit, të dy ish –anëtarë të ish –partisë së Erion Veliajt, G99, nuk janë fitues, shkruan Lapsi.al.
Duke qenë se Saimir Tahiri është kryetar i PS për Tiranën, dyshimet e Veliajt bien mbi ministrin e Brendshëm nëse ai ka gisht në këtë rezultat.
Në Asamble nuk u zgjodh një nga të përzgjedhurit e tij, Ergys Hoxha, drejtor i Antikorrupsionit në Kryeministri. Hoxha ka patur përplasje të forta me Tahirin, aq sa u përfol edhe për një konflikt fizik mes tyre. Ky fakt i shton dyshimet për ndikimin e Tahirit në votim.
Këto fakte e dyshime i thellojnë edhe më shumë ndarjet mes Tahirit e Veliajt, fërkimet mes të cilëve nuk janë gjë e re dhe janë bërë më të dukshme pas zgjedhjeve vendore të 2015.
