Detaje të rënda dalin nga situata e Afganistanit, pasi talebanët kanë marrë vendin nën kontroll. CNN shkruan se luftëtarët e shtetit islamik kanë përdorur kamxhikë dhe shkopinj kundër grave që protestuan një ditë më parë.
Kujtojmë se gratë protestuan pasi u shpall qeveria e re dhe nuk kishte asnjë grua. “Jetë të gjatë grave të Afganistanit”, “Asnjë qeveri s’mund ta mohojë praninë e grave” dhe “Do të këndoj vazhdimisht për lirinë” thërrisnin gratë gjatë protestës. Ndërkohë mësohet se talebanët ushtruan dhunë ndaj disa gazetarëve që ishin në terren.
“Jemi mbledhur këtu për të protestuar kundër njoftimit për qeverinë e re, ku nuk ka përfaqësim të grave brenda qeverisë. Po na thonë që të shkojmë në shtëpi e ta njohim dhe ta pranojmë Emiratin. Pse duhet ta pranojmë Emiratin, kur nuk ka përfshirje ose të drejta për ne”, tha një grua që po merrte pjesë në protestën e së mërkurës.
