Nga BoldNews.al
Rilindja ka vendosur një standard për drejtorët apo për të zgjedhurit në funksione të larta të administratës qendrore apo lokale: promovohen ata që kanë vjedhur më shumë. Mazhoranca po ndjek “këshillën” e Eduart Shalsit, i cili deklaroi se “nuk do të vjedhin hapur” gjatë qeverisjes. Dhe, pas 8 vitesh, në krye të institucioneve janë pikërisht këta persona që “vjedhin në mënyrë të fshehtë”.
Një rast i ngjashëm ka ndodhur edhe në Kamëz, ku kryetari aktual i Këshillit Bashkiak, Hysen Koldashi, megjithëse u denoncua nga media për marrje ryshfeti, është promovuar në krye të Këshillit Bashkiak në Kamzë. Një vendimmarrje kurajoze e Rakip Sulit, i cili ka lobuar që Koldashi të emërohet në krye të këshillit, pavarësisht se ai u denoncua në media se “shiti” shkollën të cilën e drejtonte.
Sipas dokumenteve që disponon BoldNews.al, Hysen Koldashi është emëruar Kryetar i Këshillit Bashkiak të Kamzës, megjithëse më herët ishte shkarkuar nga funksioni i drejtorit të Shkollës “Hillari Klinton”. Ai ende ka mbi supe vendimin e shkarkimit për marrje ryshfeti, ndërsa nga ana tjetër promovohet në poste të larta drejtuese. Burime për BoldNews.al thanë se emërimi i Koldashit ka ardhur pas një lobimi të fortë të kryetarit të Bashkisë së Kamzës, Rakip Suli, i cili ka kërkuar me ngulm emërimin e tij në këtë post.
Koldashi njihet për servilosje ndaj Sulit, pasi ky i fundit ka tentuar me çdo kusht pastrimin e figurës së ish-drejtorit. Por, kryetar Rakipi, a e di që Koldashi është shkarkuar nga sistemi arsimor për korrupsion? A e ka parë Rakipi denoncimin në media? Nëse jo, po ia kujtojmë më poshtë.
Në muajin maj 2020, emisioni investigativ “Fiks Fare” denoncoi me zë dhe figurë veprimet e drejtorit të shkollës 9 vjeçare “Hillari Klinton” në Kamzë, i cili materialet e shkollës së shkatërruar nga tërmeti i 26 nëntorit i shet në të zezë. Drejtori bënte pazare për materialet, teksa pohonte se nëse materialet gjenden në treg me 100 lekë ai i shet me 30 lekë. Drejtori i kërkon qytetarëve 7000 lekë të vjetra për një pllakë mermeri, ndërsa deklaronte se “shes edhe tulla me 200 mijë lekë”. Tjegullat, sipas drejtorit janë me 300 lekë copa. Drejtori vijon të bëjë pazar me materialet, ndërsa në fund pas llogarive të gjata ia pret shkurt; më jep 1 milionë lekë të vjetra dhe merr ç’të duash!
