Banorët e lagjes Sinoballa, nr. 4, në Kamëz kanë ngritur shqetësimin për gjendjen e rrugës së tyre, e cila prej rreth katër muajsh ka mbetur e pashtruar.
Sipas tyre, punimet e nisura nga Bashkia Kamëz janë lënë përgjysmë: vetëm gjysma e rrugës është asfaltuar, ndërsa pjesa tjetër ka mbetur me baltë dhe zhavorr, duke u bërë e pakalueshme sidomos gjatë reshjeve të shiut.
Qytetarët shprehen se janë detyruar ta rregullojnë vetë me shpenzimet e tyre, edhe pse paguajnë taksa. Automjetet shpesh mbeten të bllokuara, ndërsa fëmijët shkojnë në shkollë mes baltës. “Na kanë premtuar se rruga do të asfaltohej më 20 dhjetor, por edhe pse ka kaluar 20 janari, asgjë nuk është bërë,” thonë banorët, duke akuzuar kryetarin e bashkisë Rakip Suli për mungesë përgjigjeje ndaj ankesave të tyre.
Ata theksojnë se kanë bërë disa herë ankesa pranë bashkisë, por nuk kanë marrë asnjë zgjidhje konkrete. Premtimet e pambajtura dhe vonesat e punimeve, sipas tyre, po e bëjnë jetën e përditshme të vështirë dhe po i detyrojnë të shpenzojnë nga xhepi për një problem që i takon pushtetit vendor.
Ky denoncim ngre sërish pyetje mbi menaxhimin e projekteve publike dhe llogaridhënien e institucioneve vendore, ndërsa banorët e Sinoballës kërkojnë që Bashkia Kamëz të mbajë përgjegjësi dhe të përfundojë sa më shpejt punimet e nisura.
