Nga BoldNews.al
Ministrja e Infrastrukturës, Belinda Balluku, nëpërmjet Evis Berberit të ARRSH-së, ka rritur kostot e ndërtimit të rrugës Kardhiq-Delvinë. Projekti i filluar në vitin 2007 po gllabëron miliarda lekë para’ publike, aq sa rruga me vetëm dy korsi po shndërrohet nga kostoja në një autostradë. Paratë janë hedhur lumë në këtë projekt, teksa firmat kontraktore po “fërkojnë duart”. Vetëm në 2021, në këtë segment janë tenderuar apo janë shtuar kontratat në rreth 40 milionë euro. Por, deri më tani, asnjë zyrtar nuk po hetohet.
As i famshmi Ergys Verdho, që para se të linte ARRSH-në për KESH-in u dha “bakshish” firmave. Apo edhe kreu aktual i ARRSH-së, Evis Berberi, i cili ende s’po del dot nga hija e Belës së Transporteve. Por, Berberi i Autoritetit, nën patronazhimin e Ballukut, ka hapur një tender plot 15 milionë euro për të “qethur” skarpatat e rrugës së florinjtë.
Sipas dokumenteve që disponon redaksia e BoldNews.al, Berberi i ARRSH-së ka gati hapjen e një tenderi të ri për Kardhiq-Delvinë. Objekti i tenderit është “ndërtim rruga Kardhiq-Delvinë, sistemim dhe rivitalizim i skarpatave”. Por, shikojeni pak fondin. 1.6 miliardë lekë të reja, ose rreth 15 milionë euro po ti shtosh edhe TVSH-në. Një kosto tepër e lartë, duke qenë se bëhet fjalë për qethje, nga gëzhdallat që kanë lënë firmat kontrakture. Por, përse kjo shumë kur këto firma u shpërblyen para pak muajsh? Apo, disa ditë pas hapjes së tenderit për sinjaliatikën e këtij aksi?
BoldNews.al raportoi pak ditë më parë se ARRSH ka gati tenderin me objekt “ndërtim rruga Kardhiq – Delvine, loti 8, sinjalistikë dhe siguri rrugore nga loti 1 deri ne lotin 6”. Fondi limit 350,000,000 lekë. Mësohet se koha e zhvillimit të tenderit të do jetë në muajin shtator.
Ndërkohë, redaksia investigoi edhe vendimmarrjen e ish-drejtorit të ARRSH-së, Ergys Verdhos, i cili në prill 2021 akordoi plot 15 milionë euro shtesa kontratash për firmat që po ndërtojnë Kardhiq-Delvinë. Mori shtesë kontrate kompania “AGBES CONSTRUKSION” që do të fusë në arkat e saj edhe plot 467,074,582 lekë, që po ndërton lotin 6. Ndërkohë, për lotin 5 përfituesi është kompania “ALB – STAR” që do të shtojë në arkat e saj 332.517.287 lekë. Për lotin 4 është shtuar kontrata me 20 % për “COBIAL & GJOKA KONSTRUKSION” dhe do të përfitojë 465.122.013 lekë.
Sipas disa dokumenteve të tjera që ne raportuam, janë hapur edhe dy tendera të tjera për rrugët lidhëse, me vlerë 3 milionë euro.
