Një 45-vjeçar, i cili kishte dalë për të peshkuar në liqenin e Prespës, dyshohet se mund të jetë mbytur. Mëngjesin e kësaj të Diele, varka e tij është gjetur e përmbysur në liqen.
“Në orët e para të mëngjesit, jemi njoftuar se në liqenin e Prespës, Stavri Vasilovski, 45 vjeç, i cili kishte dalë gjatë mbrëmjes për të peshkuar, si pasojë e dallgëve të forta të liqenit, i është përmbysur varka dhe dyshohet se mund të jetë mbytur”, bëri me dije policia.
Të njëjtat burime shtuan se është bërë njoftimi dhe pritet ardhja e polumbarëve, për të kryer kërkimet e nevojshme, ndërsa shërbimet e Policisë Kufitare dhe grupi hetimor ndodhen në vendngjarje ku po punohet për sqarimin e plotë të rrethanave të ngjarjes.
