Esat Mala ka mbyllur bisedimet me klubin e Partizanit dhe akordi mes palëve është arritur me mesfushorin 22-vjeçar që do të rikthehet te Partizani si i huazuar. “Demat” e lanë lojtarin t’i bashkohet klubit turk Giresunspor, pasi do të përfitonin 100 mijë euro prej taksës së formimit, me Malën që nënshkroi një kontratë 3-vjeçare.
Por, Mala nuk u federua në klubin turk për sezonin e ri, bashkë me disa lojtarë të tjerë, për arsyen se Giresunspori është në krizë financiare dhe kërkon kohë që të zgjidhë këtë ngërç. Si pasojë, u ka lënë derën e hapur disa futbollistëve që të largohen në formë huazimi, përfshirë edhe Malën. Edhe pse kishte disa alternativa, mesfushori kosovar zgjodhi të rikthehej te Partizani. Dje në mbrëmje ishte vetë drejtori i Partizanit, Olsi Rama, i cili konfirmoi marrëveshjen, duke shkruar: “Me një mik të vjetër dhe të ri”.
Partizani do të përfitojë 100 mijë euro pas akordit me Giresunsporin për kartonin e Malës, para që ende nuk janë derdhur në arkat e klubit të kuq. Me rikthimin e Malës në formë huazimi, pritet që afati i pagesës të shtyhet, pasi dhe klubi i Girensusporit ka kërkuar kohë. Presidenti i ekipit turk, Hakan Karahmet, ka dalë dje në një konferencë për shtyp, ku ka treguar se klubi është në krizë financiare.
“Kur unë e bleva ekipin e Giresunsporit, po vuante që të mbijetonte në Kategorinë e Dytë. Më thanë që klubi ka vetëm 20 milionë euro borxhe, por më pas mësova se ka 70-80. Po punojmë së bashku me stafin që të krijojmë një plan sa më efikas në shlyerjen e të gjitha detyrimeve të klubit. Do të luftojmë me buxhet të limituar në elitën e futbollit turk, derisa të dalim nga kjo situatë”, u shpreh Karahmet.
