Roberto Mancini është shumë i kujdesshën në konferencën për shtyp në prag të sfidës me Belgjikën duke mos përdorur asnjë fjalë euforike për çerekfinalen në “Allianz Arena”.
Trajneri italian la të kuptohej se nuk do të ketë shumë ndryshime në formacion i cili do të jetë po ai ndaj Austrisë.
“Nuk mendoj se do të ketë ndryshime në formacion, pasi të gjithë futbollistët janë në formë të mirë dhe janë gati të bëjnë më të mirën në fushë. Megjithatë vendimin final do ta marrim nesër para ndeshjes, pasi të kemi verifikuar gjendjen fizike të gjithsecilit. Ndaj Austrisë e kishim parashikuar që do të ishte e vështirë, por mos harroni se bëmë 26 gjuajtje në portë dhe nuk ishim keq. Ka pasur momente të vështira, por në fund fituam. Ne do të përballemi me ekipin më të mirë në Evropë, ata janë në krye të renditjes së UEFA-s, dhe nuk është rastësi. Tani nuk ka sfida të lehta, të gjitha sfidat luhen për t’u fituar dhe ne do të bëjmë më të mirën tonë,” tha ai.
Lidhur me rivalët e Belgjikës, trajneri i të kaltërve tha fjalët më të mira teksa pohoi se do të donte që të ishin në fushë më të mirët e “djajve të kuq”.
“Kam shumë respekt për Belgjikën, por duhet të bëjmë lojën tonë dhe të shohim si do të shkojë ndeshja. Nuk ka më ndeshje të lehta, pasi të gjithë e patë çfarë i ndodhi Francës dhe Holandës, megjithatë do të kërkojmë fitoren. Me Roberto Martinez jam përballur shumë herë dhe tani ai vjen si trajner i njërës prej skuadrave më të forta në botë. Është e drejtë që ta përgatisin ndeshjen në fshehtësi, pasi bëhet fjalë për një sfidë shumë të rëndësishme. Shpresoj që De Bruyne dhe Hazard të rikuperohen, pasi do të ishte mëkat të mungonin në një ndeshje të tillë”, u shpreh Mancini.
