Ambasadori amerikan në Tiranë, Donald Lu i ka dhënë një shuplakë sot ministrit të Brendshëm dhe Policisë. Ambasadori Lu deklaroi sot se trafikantët e drogës kanë mbështetje nga shteti.
Duke iu referuar Klemend Balili, të ashtuquajturit “Escobari i Ballkanit”, Lu tha se policia ka dështuar.
“Trafikantët e drogës, kanë mbështetje nga shteti. Rasti më i fundit është ai i Klemend Balilit. Policia ka dështuar”, deklaroi ai.
Ambasadori ka rrëfyer para të pranishmëve se prej 7 muajsh i kishte kërkuar ministrit të Brendshem, ministrit të Drejtësisë dhe Prokurorit të Përgjithshëm të arrestonin këtë ‘peshk te madh’ dhe që prej asaj dite nuk ishte bërë asgjë. Donald Lu, tha se kushti i SHBA-ve për të bashkëpunuar me Shqipërine në luftën kundër narkotikëve është pikërisht arrestimi i peshqve të mëdhenj, si Klement Balili.
“Për 7 muaj kam nxitur autoritetet ta arrestojnë. SHBA-të ka kërkuar arrestimin e peshqve të mëdhenj”, tha Lu.
DEKLARATA E AMBASADORIT
Sipas të vëllait ai ecën lirisht në rrugët e Tiranës sepse deri të premten e kaluar zyra e Kryeprokurorit nuk kishte urdhëruar arrestimin e tij. Vonesa në arrestimin e Klement Balilit, ish-zyrtar në Sarandë, përfaqëson një dështim të madh të Policisë dhe sistemit të Drejtësisë.
Kanë kaluar 7 muaj që kur policia greke arrestoi trafikantët e drogës të lidhur me Balilin në Greqi. Që atëherë ka qenë në kërkim nga policia greke. Kanë kaluar 7 muaj që kur ministria e drejtësisë dërgoi persona në Geqi për tërheqjen e dokumenteve. Tani kanë 10 mijë faqe dokumentacion. Agjencitë ligjzbatuese të SHBA i kanë thënë zyrës së Prokurorit të Përgjithshëm të arrestojnë Balilin.
Për shtatë muaj kam nxitur Policinë, Ministrin e Brendshëm, Ministrin e Drejtësisë, që ta arrestojnë. Nëse Shqipëria nuk mund të kapë Klement Balilin si mund të shkojë pas peshqve të tjerë të mëdhenj? Kush do të donte të punonte me Shqipërinë? Kush do të besonte se ky është një vend serioz në luftën kundër trafikut të drogës? SHBA i kanë thënë Shqipërisë se bashkëpunimi ynë i ardhshëm në luftën kundër narkotikëve është i kushtëzuar nga arrestimi i peshqve të mëdhenj nga ana e Shqipërisë, përfshirë Klement Balilin.
